Семей қалалық ішкі саясат бөлімі негізінде құрылған арнайы ақпараттық-насихат тобы өткен аптада Семей қаласының қорғаныс істері жөніндегі басқармасында, № 4 жалпы орта білім беретін мектепте Елбасының «Нұрлы жол – болашаққа бастар жол» Жолдауын насихаттау мақсатында кездесулер өткізді.
{jcomments on}Ақпараттық-насихат тобының мүшелері, ішкі саясат бөлімінің бас маманы Юрий Осьмаков пен еңбек ардагері Серік Төлеуғалиев әскерилермен жүздесу барысында шараның басты мақсаты Елбасының Жолдауында айтылған басым бағыттарды талқылау, мемлекеттік маңызды құжатта белгіленген тапсырмаларды жүзеге асыру барысын айқындау екендігін жеткізді.
— Мемлекет басшысы Н.Ә.Назарбаев әр жылғы Жолдауында халықтың әлеуметтік-экономикалық дамуын алдыңғы орынға қояды. Биылғы он сегізінші Жолдауында да әлемдік дағдарыс орын алуы мүмкін деп жорамалданып отырған шақта дағдарыстың алдын алу жолдарын көрсетті. Экономикалық дамуымыздың қарқынын бәсеңдетпей, халықтың әл-ауқатын арттыруға тапсырма берді,- деген С.Төлеуғалиев Жолдауда айтыл-ған жеті басым бағытты талдап өтті.
Қаламыздағы жалпы орта білім беретін №4 мектепте жоғарғы сынып оқушыларымен және ұстаздар қауымымен болған жиында № 6 мектептегі, «Мәңгілік Ел» білім және тәрбие орталығының жетекшісі Р.Даутбаев маңызды құжатта жолдармен қатар, халықты тұрғын үймен қамту мәселесін шешу жолдары көрсетілгендігін жеткізді. Сондай-ақ «Нұрлы жол» болашаққа даңғыл жол сала отырып, еліміздің өркениетті елдер арасында алдыңғы орында көрінуімізге септігін тигізетіндігіне де тоқталды. Мәңгілік Ел болуымыздың басты себепкері жастар, қазіргі таңдағы мектеп партасындағы оқушылар екендігін айтқан Р.Даутбаев білімді, ғылым мен өркениетті меңгерген, дені сау, ұлттық құндылықтарын бағалай алатын жастары бар ел тарих сахнасында мәңгі ғұмыр жасайтындығын тілге тиек етті.
Әйгерім СӘРСЕНҒАЛИ,
«Семей таңы»
