ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша Департаменті басшысының орынбасары, тәртіптік кеңес төрағасы Тоқтамыс Жұмағұлов Семей қаласына екі күндік іссапармен келіп, қалалық әкімдікте, мектептер мен ЖОО-да жиын өткізді. Кездесулерде ҚР-ның 2015-2025 жылдарға арналған сыбайлас жем-қорлыққа қарсы стратегиясын жүзеге асыру және құқық бұзушылықтың алдын алу мәселелері қаралды.
{jcomments on}Мемлекеттік қызметкерлермен кездесу барысында Тоқтамыс Жұмағұлов ең алдымен ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің жұмыс бағыттарымен таныстырды.
— Бұрынғы Қаржы полициясы мен Мемлекеттік қызмет істері агенттігі таратылып, оның функциялары жаңа құрылған ҚР Мемлекеттік қызмет істері және жемқорлыққа қарсы іс-қимыл агенттігіне өтті. Жаңа агенттік мемлекеттік қызметке қатысты барлық мәселелер бойынша, сыбайлас жемқорлықпен күрес және мемлекеттік қызмет көрсету сынды үш бағытта жұмыс істейді. Агенттіктің ұраны — «Біздің міндет – халыққа қызмет», басты критерийі — Мемлекеттік қызмет істері және сыбайлас жемқорлыққа қарсы іс-қимыл агенттігіне деген халық сеніміне ие болу, — деген Т.Қожағұлов жаңа агенттік бұрынғы қаржы полициясының міндетіне кірген тексеру жұмыстары арқылы емес, профилактикалық жұмыстар жасап, жемқорлықтың алдын алу шараларын қолданатындығын жеткізді.
— Агенттік жүйелі түрде жұмыс істейді. Сыбайлас-жемқорлыққа тән әрекеттер әшкереленсе, әрекет не үшін орын алды, оның жүзеге асуына кімдер және қандай жағдайлар себепкер болды деген сауалдар зерделенеді. Агенттік негізінде арнайы бөлімшелер құрылып, тексеру емес, жан-жақты сараптама жасалады, — деп ойын ортаға салған Тоқтамыс Қадошұлы жүйелі түрде жұмыс жасағанда ғана жұмыс нәтижесі көрінетіндігін баса айтты.
Жаңа агенттік жұмыстары бойынша Елбасының жарлығымен 2014 жылдың желтоқсан айында сыбайлас жемқорлыққа қарсы стратегия қабылдан-ған. Мемлекеттік сыбайлас жемқорлыққа қарсы саясаттың тиімділігін арттыру, сыбайлас жемқорлыққа қарсы қозғалысқа бүкіл қоғамды жұмылдыру, елімізде сыбайлас жемқорлық деңгейін төмендету стратегияны қабылдаудағы басты мақсат болып отыр. Тәртіптік кеңес төрағасы жемқорлықпен күрес белгілі бір агенттіктің, департаменттің немесе басқарманың ғана жұмысы емес, жалпы халық болып жұмылатын мәселе екендігін айтты. Облыс бойынша орын алған жемқорлыққа қатысты статистикалық мәліметтерді ұсынды. Айтуынша, өткен жылдың 12 айы бойынша облысымызда 95 қылмыстық іс қозғалған. Кез келген әрекет жазаланусыз қалмауы керектігін тілге тиек еткен Т.Қожағұлов жүйелі жоспардың арқасында сыбайлас жемқорлықтың саны азаятындығына сенім білдірді.
Жиын соңында Тоқтамыс Жұмағұлов ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша Департаментінің Семей өңірі бойынша басқарма басшысы ретінде Жиенбаев Қайрат Қажымұқанұлын таныстырды.
Ақпараттық түсіндіру жұмыстарын жүргізген тәртіптік кеңес төрағасы іссапары барысында қаламыздағы № 6 мектеп-гимназиясында мектеп директорлары және балабақша меңгерушілерімен, Семей қаласының Шәкәрім атындағы мемлекеттік университетінің және Қазақ инновациялық гуманитарлық-заң университетінің ұжымымен кездесті. Аталмыш тақырып Ішкі істер басқармасының қызметкерлерімен, ІІБ ОВ 156/15 мекемесі № 35 түзеу колониясы ұжымымен жүздесу барысында да кеңінен талқыланды.
Әйгерім СӘРСЕНҒАЛИ,
«Семей таңы»
