Semeytany.kz — Абай облысының әкімі Берік Уәлидің төрағалығымен өткен кеңесте алдағы жылыту маусымына дайындық пен халықты ауызсумен қамту мәселелері талқыланды. Отырысқа облыстық басқарма басшылары, көмір тасымалдау ұйымдарының өкілдері, сондай-ақ аудан және қала әкімдері бейнебайланыс арқылы қатысты.
Кеңес барысында энергетика және тұрғын үй-коммуналдық шаруашылығы, денсаулық сақтау, білім басқармаларының жетекшілері, сондай-ақ барлық аудан-қала әкімдері жылумен және сумен қамту бағытындағы ағымдағы ахуал туралы есеп берді. Аймақ басшысы бірқатар кемшіліктерге назар аударып, жауапты тұлғаларға жұмысты жеделдету жөнінде нақты тапсырмалар жүктеді.
Берік Уәли жылыту маусымына дайындықты күшейтіп, ауызсумен қамту бойынша қолға алынған жобаларды бекітілген кестеден кешіктірмей аяқтауды міндеттеді. Әсіресе әлеуметтік нысандардың, қазандықтар мен жылу көздерінің дайындығын, көмір жеткізудің үздіксіздігін қамтамасыз ету тапсырылды.
«Екі мәселе де өте өзекті. Үкімет отырысында да бірнеше мәрте қаралды. Қыс қыр астында тұр. Жылу маусымына аз уақыт қалды. Аяқ асты күн суытса жылу беруге дайын болуымыз керек. Жылыту маусымына дайындық өте үлкен жауапкершілік. Ал аудан әкімдері осыған тікелей жауапты. Сондықтан бұл бағыттағы жұмысты ширату қажет», — деді облыс әкімі.
