Semeytany.kz — Семейде жаңа өрт сөндіру депосы пайдалануға берілді. Салтанатты шараға Абай облысының әкімі Берік Уәли, ҚР Төтенше жағдайлар министрі Шыңғыс Әрінов, департамент қызметкерлері мен сала ардагерлері қатысты.
Аймақ басшысы жаңа бөлімнің ашылуы өңір халқының қауіпсіздігін арттыруға қызмет ететінін атап өтті. Оның айтуынша, азаматтық қорғау жүйесін дамытуға облыстық бюджеттен 1 млрд 300 млн теңгеден астам қаржы бөлініп, нәтижесінде 200-ден аса заманауи техника сатып алынған. «Өрт сөндіруші мен құтқарушы – антқа адал, жауапкершілігі жоғары мамандық иелері. Бұл бөлім төтенше жағдайлардың алдын алуда тиімділік береді», – деді Берік Уәли.
Жоба толықтай «Демеу Қазақстан қоры» корпоративтік қоры есебінен қаржыландырылды. 0,82 гектар алаңда орналасқан депо 6 арнайы техникаға арналған бокспен жабдықталған. Нысан жанында қызметкерлерге арналған фитнес-зал бар, ал екі қабатты, 11 бөлмелі апартаментте мамандардың тұрмысына қажет барлық жай-күй қарастырылған.
Төтенше жағдайлар министрі Шыңғыс Әрінов бұл – Семей өңірінде азаматтық қорғау саласы бойынша соңғы 30 жылда салынған алғашқы жаңа ғимарат екенін айтты. Екінші кезеңде қызметтік баспана салу жоспарланып отыр. Шара барысында өңірдегі бөлімдерге өтімділігі жоғары КамАЗ беріліп, Абай және Жаңасемей аудандарының Архат пен Қайнар ауылдарына өрт сөндіру техникасы табысталды.
Қазір Абай облысында 70 өрт сөндіру бекеті жұмыс істейді, соның 11-і жыл бойы тұрақты режимде қызмет көрсетеді. Биыл «Ауыл құтқарушылары» бағдарламасы аясында Бесқарағай ауданында және Мақаншы ауданындағы Алакөл демалыс аймағында жаңа бекеттер ашылды. Жыл соңына дейін осындай бірнеше нысанды іске қосу жоспарланып отыр.
