Семейдің облыстық тарихи-өлкетану мұражайының Қарауылдағы филиалының қоры көне жәдігермен толықты. Аудан орталығында тұратын жасы тоқсанға келген, ұзақ жылдар КСРО Мемлекеттік банкісінің Абай аудандық бөлімшесін басқарған Күләш Жақыпқызы өзінің көздің қарашығындай сақтап келген көне кебежесін жергілікті мұражайға өткізді.
{jcomments on}Күләш әжейдің айтуынша, ұзақ жылдар прокурор, ауылдық кеңестерде төраға болып қызмет істеген әкесі Жақып Әлібаев пен анасы Зейнекен Әуесбекқызы 1922 жылы бас құрап, отау көтергенде кебежені, жүкаяқты, ағаш төсекті және шай үстелін ауыл арасындағы шебер ұстаға жасатқан көрінеді. Бүгінгі таңда Күләш Жақыпқызының ата-анасының көзіндей мұра болып сақталғаны — тек осы көне кебеже ғана. Ал қалған тұрмыстық бұйымдар, көшіп-қонып жүргенде, қирап, жоғалған көрінеді. Мұражай қорына өткізілген кебеже екі бөліктен тұрады: кебеженің негізгі ыдыс-аяқ және ас қоятын бөлігі және оны көтеріп тұратын төрт аяқты тақтайша. Кебеженің биіктігі 120 см, ені 67см, жеке-жеке сөрелері бар. Сырты әдемі ағаштардан жасалған ою-өрнектермен көмкерілген. Кебежеге қойылатын тағамдар бүлінбес үшін, төменгі қабатында ауа кіріп тұратын арнайы саңылау жасалған. Сыры кетсе де, сыны кетпеген құнды зат өте жақсы сақталған. Ғасырға жуық тарихы бар кебеже жайында:
— Ауылымыздың қазыналы қариясы Күләш Жақыпқызының мұражайға көне кебежені өткізуі – көпке үлгі боларлық жайт. Осындай ұрпақ игілігі үшін жасалған ізгі істерден көпшілік тәлім алып, мұражай қорына өткен күннің тарихынан сыр шертетін заттарды өткізсе екен деген тілегім бар,- дейді мұражайдың Қарауылдағы филиалының меңгерушісі Малгаждар Жүнісжанов.
Бұлбұл ӘНУАРБЕКҚЫЗЫ,
«Семей таңы»
