Semeytany.kz — Абай облысы Геодезия, картография және құрылыс жоғары колледжі Германияның «MICHEL METALLBAU GmbH & Co. KG», «A&E NENASCHEW GMBH ELEKTROTECHNIK» және «Solonex GmbH» компанияларымен ынтымақтастық туралы меморандумға қол қойды.
Келісім бойынша колледждің 3-курс студенттері мен өндірістік оқыту шеберлері 2025 жылдың қазанынан бастап үш айлық кәсіби тағылымдамадан өтеді. Қатысушылар халықаралық ортада білімін жетілдіріп, заманауи өндірістік тәжірибені меңгеруге мүмкіндік алады.
Тағылымдама «Ғимараттар мен құрылыстарды салу және пайдалану», «Электргазымен дәнекерлеуші», «Жиһаз өндірісі» мамандықтарының студенттерін қамтиды. Бастама әзірге тек Абай облысы Геодезия, картография және құрылыс жоғары колледжі базасында жүзеге асады.
Бағдарламаны сәтті аяқтаған түлектерге серіктес компаниялар халықаралық үлгідегі сертификат береді. Бұл құжат еңбек нарығындағы бәсекеге қабілеттілікті арттырып, түлектердің кәсіби мүмкіндіктерін кеңейтеді.
