Үржар аудандық орталық музейінде Кеңес әскерінің Ауғанстан жерінен шығарылған күніне байланысты «Ауғанның асуында от кешкендер» атты кездесу өтті. Шараның өтуіне музей директоры Серікбай Туғанов пен Жансүгіров атындағы орта мектеп директоры Гауһар Жалғабаева ұйытқы болды.
{jcomments on}Ұйымдастырушылар әрбір елдің болашағы өз Отанына шексіз берілген патриоттық рухы жоғары, ержүрек, қайсар ер-азаматты тәрбиелеуден бастау алатындығын, халқымыздың ерлік дастаны ата-бабамыздың сонау заманда найзаның ұшы, білектің күшімен жер қорғауынан бастап, одан бері әртүрлі соғыс зобалаңдарын бастан өткергендігін және тарих жылнамасынан өзінің қаралы нәубет жылдарымен орын алған зұлматтың бірі Ауған соғысы екендігін атап өтті. Шара барысында ауған жеріне 23 мың қазақстандықтың қатысқандығы жөнінен тарихи деректер келтірілді. «Соғысқа аттанған өрімдей жастардың алдында үлкен мақсат тұрды. Ол Ауғанстан жеріндегі дұшпандар басқыншылығына тойтарыс беріп, бейкүнә халықтың тыныштығын қорғау және өзінің Отан алдындағы интернационалдық борышын қалтқысыз өтеу болатын» — деген пікірлер айтылды.
Кездесу қонағы өмір мен өлім белдескен қанды шайқасқа қатысып, батырлық пен ерліктің ерен үлгісін көрсеткен қаһарман жерлесіміз Талғат Айтмұхаметұлы Бәшіров сөз алып, от пен оқтың арасындағы естен кетпес оқиғаларын мектеп оқушыларына әңгімелеп берді. Алдымен соғыс жайлы саяси тұрғыда тоқталып өтіп, жастарды өз елінің патриоты болуға, Отанды сүюге, спортпен шұғылдануға, білімді болуға шақырды. «Бейбіт аспан астындағы бақытты ғұмырымыз баянды болғай»,- деген тілегін білдірді интернационалист жауынгер.
Шара Жансүгіров атындағы орта мектеп оқушыларының патриоттық концерттік бағдарламасымен жалғасты.
Бауыржан ЖАҚЫП,
«Семей таңы»
