Semeytany.kz — Облыс әкімі Берік Уәли «Tumar Minerals Ltd.» компаниясының өкілдерімен кездесіп, өңір аумағында, соның ішінде Семей қаласында жүзеге асатын инвестициялық жобаларды талқылады.
Кездесуде «Tumar Minerals Ltd.» директорлар кеңесінің төрағасы Серік Тәукебаев индустрияландыру картасы аясында Абай облысында түрлі-түсті және сирек кездесетін металдарды өндіретін кен байыту комбинатын салу, сондай-ақ Семейдегі «Өндіріс» индустриялық аймағында жоғары деңгейлі өңдеу зауытын орналастыру жөнінде ұсыныстарын жеткізді. Компания Қытайдың алдыңғы қатарлы кәсіпорындарымен және ірі өңдеу зауыттарымен әріптестік орнатқан. Инвесторлардың айтуынша, жобаның алғашқы кезеңінде кен орны іске қосылған жағдайда 300-ге жуық тұрақты жұмыс орны ашылады.
Аймақ басшысы ұсыныстарды қарастыруға дайын екенін айтып, Семейдегі «Өндіріс» индустриялық аймағын ұлғайту жұмыстары жүріп жатқанын атап өтті. «Біз өңірді дамытуға ниетті инвесторлармен жұмыс істеуге мүдделіміз. Қазіргі уақытта Семей қаласындағы “Өндіріс” индустриялық аймағын ұлғайтып жатырмыз. Сіздердің тараптарыңыздан көтерілген бастамаларды қолдауға әзірміз», — деді Берік Уәли.
