Ақпанның 15-і күні Ауған жерінен әскердің шығарылғанына 26 жыл толуына орай, интернационалист — жауынгерлер мемориалының жанында арнайы митинг өтті. Шараға қала әкімінің орынбасары Зәуреш Исабаева, Ауған соғысының ардагерлері, «Шығыс» өңірлік әскери қолбасшылығының әскери қызметкерлері қатысты. Жиын барысында соғыста қаза тапқан жауынгерлердің аналарына «Азалы кітап» табыс етілді.
{jcomments on}26 жыл. Он жылға созылған соғыстан кейін әскерлердің Ауған жерінен шығарылғанына, міне, осынша уақыт өтті. Алайда ол әкелген қайғы-қасіреттің табы қаза тапқан жауынгерлер мен марқұмдардың қарулас достарының жүректерінен өше қойған жоқ. Талай боздақтарымыз қыршыннан қиылып, өмірімен ерте қоштасты. Қырық төрт семейлік азамат майданда қаза тапса, екі жауынгер із-түссіз жоғалды. «Ауған соғысы және жергілікті соғыстар ардагерлері мен мүгедектері» қоғамдық бірлестігінің төрағасы Боранбай Бегатовтың айтуынша, бұрынғы Семей облысынан Ауғанстанға мыңнан астам жауынгерлер мен офицерлер аттанған көрінеді. Қазіргі таңда Семейде 445 Ауған соғысының ардагері тұрып жатыр. Олар мүмкіндіктері жеткенінше қаза тапқан жауынгерлердің ата-аналарымен жылы қарым-қатынастарын сақтап, көмек көрсетуде. Ауған соғысы ардагерлерінің әрқайсысы үшін ең басты күн болып 15 ақпан – кеңес әскерлерінің Ауғанстан жерінен шығарылған күні саналады.
Мемориалға гүл шоқтарын қойып, қаза тапқан жауынгерлердің рухтарына тағзым еткендердің арасында қайтыс болған офицердің зайыбы Татьяна Отрощенко да болды. Оның жұбайы Владимир Отрощенко 1980 жылы Ауғанстан жеріне аттанған. 1981 жылы 2-ші қазан күні әскери тапсырманы орындау барысында қайтыс болған.
— Ауған соғысында көз жұмған жауынгерлердің ата-аналары мен жұбайлары үшін 15-ші ақпан – ерекше күн. Бізді ұмыт қалдырмай, қолдау білдіріп келе жатқандары үшін Ауған соғысы ардагерлеріне алғысымды айтамын. Бүгін де, міне, олар мүмкіндіктерінше бізге ерекше көңіл бөліп қамқорлық танытуда,-дейді Татьяна Отрощенко.
Бір минут үнсіздік пен гүл шоқтарын қою рәсімінен кейін еске алу күні Абай атындағы театрда жалғасын тапты. Салтанатты жиын барысында Ауған соғысында көз жұмған жауынгерлердің және офицерлердің ата-аналары мен жұбайларына «Азалы кітап» табыс етілді. Онда қайтыс болған және із-түссіз жоғалған шығыс-қазақстандық жауынгерлердің әрқайсысы туралы мәліметтер мен олардың фотосуреттері басылған. Кітаптың шығуы жөнінде айта келе, «Ауған соғысы және жергілікті соғыстар ардагерлері» қоғамдық бірлестігінің төрағасы Боранбай Бегатов:
— Қазіргі таңда Ауған соғысы жауынгерлерінің құрметіне орнатылған мемориалдың жөндеу жұмыстарын атқаруға қатысты шаралар қолға алынуда. 2002 жылы бой көтерген ескерткіш бүгінде жөндеуді қажет етеді. Былтыр жергілікті бюджет есебінен маңайындағы шағын саябақ жөндеуден өткізілген болатын, биыл кезек ескерткіштің өзіне келіп жетті,- деді.
Мирас ҚҰСАЙЫН,
«Семей таңы»
