Мемлекет басшысы үкіметтің кеңейтілген отырысында қазіргі уақытта елге жаңа жағдайға бейімделу керек болатынын, ол үшін экономикалық және заңнамалық сипаттағы жедел шаралар қажет екенін атап айтып, Үкіметтің, Ұлттық банктің және әкімдердің алдына бірқатар міндеттер қойды. Нұрсұлтан Әбішұлы Назарбаев әр өңірде жұмыспен қамтылуға ықпал ету бағдарламалары әзірленуі тиістігін айтты, еңбек дауларын дер кезінде шешу ісінің маңыздылығына назар аударды. Осыған байланысты әкімдерге ірі кәсіпорындармен меморандум жасау және босаған жұмысшыларды жұмысқа орналастыру мәселесін шешу тапсырылды. Сондай-ақ Президент әлемдік экономикадағы жаңа жағдайларды ескере келгенде, негізгі бағыт ауыл шаруашылығы өнімдерін және азық-түлік өнеркәсібін дамыту болып саналатынын атап өтті.
{jcomments on}Елбасы бизнесті дамыту үшін теңдессіз жағдайлар жасалып отырғанын, соның ішінде жоспарлы тексерістердің толығымен тоқтатылғанын, әртүрлі рұқсаттамалардың азайтылғанын атап өтті. Жағдай жасалып отырғанда, өндіріс көлемін арттыруға әрбір кәсіпкер, кәсіпорын мүдделі деп ойлаймын.
Ең бастысы, ауыл шаруашылығы өнімдерін шетелдерден тасымалдамай, халқымызға жеткілікті өнімді отандық өндірушілер өндірсе, дағдарысты айналып өтуімізге мол мүмкіндік болмақ. Осы орайда аудандағы ірі өндіріс ошақтарын басқарып отырған кәсіпкерлермен жұмыс орындарын қысқартпау мақсатында аудан әкімшілігі меморандум жасады. Сонымен қатар Н.Ә.Назарбаевтың әкімдер алдына қойған талаптарын межелі түрде орындау әрқайсымыздың міндетіміз деп білеміз. Нәтижелі, сапалы жұмыс үшін әрекет етіп, зайсандықтардың алда тұрған міндеттерді абыроймен орындауына мүмкіндіктер мол.
Алмас ОҢДАҚАНОВ,
Зайсан ауданының әкімі.
