{jcomments on}Әлемдегі геосаяси ахуалдың қандай қиын жағдайда тұрғаны баршамызға аян. Қазақстан халықаралық қауымдастықтан бөлек емес. Дағдарыстан еліміздің дегбірі қашпайды деп болжағанымызбен, дүниежүзіндегі саяси, экономикалық үрдістердің біздің мемлекетке әсер ететіні сөзсіз. Қазіргі әлемдегі тұрақсыз ахуал біздің дереу шешімдер қабылдауымызды талап етеді. Тәжірибеде көрсетіп жүргендей, біз тиімді шараларды қабылдауда заман ағымының алдында болуымыз керек. Яғни бұл сайлауды өткізу алда тұрған түрлі қиындықты еңсеру үшін сенімді басшыға мандат беру, соның айналасына топтасу болып табылмақ. Қазақстан халқы Ассамблеясы мүшелері жариялаған Үндеуде: «Әлемде тұрақсыздық орын алған жаңа әрі күрделі кезеңде еліміз стратегиялық бағытынан айнымай, Қазақстанды жаңғырту және дүниежүзінің озық 30 елінің қатарына енуі үшін, Елбасы Н.Ә.Назарбаевқа сенім білдіру қажет. Сонымен қатар Елбасына сенім мандатын білдіру арқылы әлемдік дамудың жаңа кезеңінде халқымызды біріктіріп, мемлекетті дамытудағы маңызды мәселелерге ден қоюға мүмкіндік аламыз. Бүгінде «Нұрлы жол — болашаққа бастар жол» бағдарламасын және «Қазақстан-2050» ұзақмерзімді Стратегиясын жүзеге асыру үшін бар күш-жігерімізді біріктіру керек. Мемлекет басшысы жүргізіп отырған саясат төңірегінде топтасу арқылы еліміздің одан әрі қарқынды дамуы мен азаматтардың әл-ауқатын арттыруға қол жеткізе алатынымызға сенімдіміз. Сондықтан осы күрделі заманда біз барша қазақстандықтарды Елбасы Н.Ә.Назарбаевтың төңірегінде топтасуға шақырамыз»,- деп көрсетілген. Бұл пікірмен барлық қазақстандықтар келісіп, үндеуге қолдау танытатындығына сенімдімін.
Жандос ӘУБӘКІР,
Абай мұражайының директоры.
