Semeytany.kz — Мемлекет басшысы Қасым-Жомарт Тоқаев Біріккен Ұлттар Ұйымын жан-жақты жаңғырту уақыт талабы екенін атап өтіп, Қауіпсіздік Кеңесін реформалау қажет екенін айтты. Президенттің сөзінше, Кеңес құрамына Азия, Африка және Латын Америкасындағы ірі мемлекеттердің өкілдері ротация тәртібімен енуі тиіс.
Тоқаевтың пікірінше, қазіргі геосаяси жағдайда жауапкершілігі бар орта державалардың үні Қауіпсіздік Кеңесінде анық естілуі керек. Осы санаттағы елдер жаһандық тепе-теңдікті сақтауға, өзара сенімді нығайтуға үлес қосып, алпауыттар ортақ байламға келе алмаған сәтте дәнекер бола алады. Сондықтан Қазақстан орта державалардың институционалдық деңгейде қатысуын кеңейтуді қолдайды.
Президент БҰҰ-ның беделін арттыру үшін мүше мемлекеттер нақты қадамдарға баруы қажет екенін жеткізді. Әйтпесе, Ұйым түйткілдердің салдарымен ғана күресуге мәжбүр болып, түпкі себептер көбейе береді. Осы ретте мемлекеттер БҰҰ Жарғысындағы егемендік, аумақтық тұтастық және дауларды бейбіт жолмен шешу қағидаттарын мүлтіксіз ұстануы тиіс. Жарғыны таңдамалы түрде қолдану Ұйымның беделіне нұқсан келтіреді.
Қорытындылай келе, Қазақстан БҰҰ-ны реформалау жөнінде нақты ұсыныстар әзірлейтін және оларды табанды түрде ілгерілететін жоғары кәсіби пікірлестер тобын құруды ұсынды. Бұл бастамалар БҰҰ-ны бүгінгі сын-тегеуріндерге және ертеңгі міндеттерге сай етуді көздейді.
