Semeytany.kz — Абай облысы әкімінің орынбасары Мейірлан Раханов Ресей Федерациясының құрамындағы Карелия Республикасына жұмыс сапарымен барып, екі өңір арасында ынтымақтастықты кеңейту жөніндегі меморандумға қол қойды.
Құжат Қазақстан мен Ресей арасындағы достық және әріптестікке негізделген келісімдерге сүйене отырып, Абай облысы мен Карелияның сауда-экономикалық, ғылыми-техникалық, гуманитарлық, әлеуметтік және мәдени байланыстарын тереңдетуге жол ашады. Тараптар инвестиция тарту, құрылыс және логистика, шағын және орта кәсіпкерлік, ауыл шаруашылығы бағыттарында өзара іс-қимылды күшейтеді. Өнеркәсіп саласында жеңіл, тау-кен, өңдеу, тамақ, металлургия және орман өнеркәсібі бойынша жобалар қарастырылған.
Білім беру бағытында оқу орындары арасында тікелей байланыс орнату, педагогтар мен студенттердің тәжірибе алмасуын ұйымдастыру жоспарлануда. Сонымен қатар мәдениет, денсаулық сақтау, туризм, спорт және әлеуметтік қорғау салаларында бірлескен бастамалар іске асырылатын болады.
Тараптар бірлескен бағдарламалар мен іс-шаралар жоспарын әзірлеуге, ортақ жобаларды жүзеге асыруға, көрмелер мен жәрмеңкелерге қатысуға, ақпарат алмасуға және өзара делегациялар жіберуге уағдаласты. Қорытындысында Абай облысы атынан Карелия делегациясына 2026 жылдың бірінші тоқсанында өңірге ресми сапармен келу ұсынысы жолданды.
