Semeytany.kz — Облыс әкімі Берік Уәлидің төрағалығымен өткен әкімдік отырысында квазимемлекеттік сектор қызметін талдау және жер қойнауын пайдаланушыларды облыс аумағына қайта тіркеу мәселелері қаралды.
Қаржы басқармасының басшысы Гүлфайрус Серікболова мен Кәсіпкерлік және индустриялық-инновациялық даму басқармасының басшысы Айбек Рахымбековтің мәліметінше, биыл 14 кәсіпорын Абай облысына қайта тіркелді: соның 10-ы заңды мекенжайын өзгерткен, 4-і филиал ашқан. Нәтижесінде 2025 жылдың қаңтар–тамыз айларында жер қойнауын пайдаланушылардан түскен салық 23,7 млрд теңгеге жетті. Тағы бірнеше компанияны қайта тіркеу жоспарда бар.
Берік Уәли табиғи ресурстарды заң талаптарына сай игеру – өңірдің әлеуметтік-экономикалық дамуы мен келер ұрпақ алдындағы жауапкершілік екенін атап өтті. Әкім квазимемлекеттік ұйымдардың жұмысын кешенді ішкі талдаудан өткізіп, кемшіліктер бойынша нақты шара қабылдауды тапсырды. Облыс әкімінің бірінші орынбасары Ербол Садыр мен Кәсіпкерлік басқармасына басқа өңірде тіркеліп, Абай облысында жұмыс істеп жүрген жер қойнауын пайдаланушыларды қайта тіркеуді мүдделі органдармен бірлесіп жеделдету міндеттелді.
Аудан, қала әкімдеріне және құқық қорғау органдарына жер қойнауын заңсыз пайдалану фактілерін анықтау үшін рейдтер өткізу жүктелді. Сонымен қатар жылу құбырларын ауыстырғаннан кейінгі қазылған учаскелерді уақтылы қалпына келтіру, «Таза Қазақстан» аясындағы сенбіліктерді жүйелі жалғастыру және «Ауылда денсаулық сақтауды жаңғырту» ұлттық жобасымен салынған медицина нысандарын тез арада пайдалануға беру тапсырылды.
