Қазіргі таңда әлеуметтік желілерде аутистік спектрдің бұзылуына шалдыққан балалар тақырыбы жиі көтеріле бастады. Тағдырдың тәлкегіне тумай жатып тап болған бұл періштелерге кейбірі жанашырлықпен қарап, қолдау көрсетуге тырысса, енді бірі оларды дені сау балалардан оқшаулау қажет деген дабыл қағуда. Тіпті ар-ұяттан жұрдай бір әйел оларды өмір сүруге құқығы жоқ деп, адам шошырлық пікір айтудан тайынбады.
Аутизм — бүгінгінің індеті ме, әлде ғылым мен медицинаның әлі де толық зерттеп үлгермеген жұмбағы ма? Біреулер бұған тағамның құрамын кінәласа, енді бірі — смартфон, планшет сынды электронды құралдардың әсері деп тұжырымдайды. Анығы — бұл диагноз қазір жиілеп барады.
Ең өкініштісі, аутизмге шалдыққан балалар елімізде әлі күнге дейін ресми түрде мүмкіндігі шектеулі жандар қатарына кірмеген. Сәйкесінше, олар үшін әлеуметтік көмек те қарастырылмаған. Ата-аналар балаларына тәуліктеп байлаулы. Ал арнайы орталықтардың бағасы қарапайым отбасылар үшін тым қымбат.
Бұл — бір ғана отбасының емес, тұтас қоғамның алаңдаушылығын тудырып отырған өзекті мәселе. Аутизмге шалдыққан балалар да — қоғамның бір бөлшегі, олар да мейірім мен қолдауға зәру. Сондықтан бұл тақырыпты жабулы қазан күйінде қалдырмай, мемлекет, қоғам және әрбір саналы азамат деңгейінде нақты шешімдер қабылдануы керек.
