Семей қаласының спорттық шеберлік мектебінде аталмыш мекеме мен Республикалық Дойбы федерациясының бірлесіп ұйымдастыруымен «Дойбыны үйрету, ойнату және бағалау әдіс—тәсілдері» атты республикалық семинар өтті.
{jcomments on}Семинарға Республикалық Дойбы федерациясының президенті Алла Чуприк пен спорт шебері, ҚР еңбек сіңірген жаттықтырушы Жандос Үсенов, дойбыдан бірнеше дүркін Азия және Қазақстан чемпионы Юлия Рынгач, сол сияқты Астана мен Алматыдан, Шымкент, Қарағанды, Павлодар сияқты еліміздің бірқатар қалаларынан дойбы спортының майталмандары, сонымен қатар Семей қаласындағы орта білім беретін мектептердің дене тәр-биесі пәнінің мұғалімдері қатысты. Семинардың мақсаты – еліміздегі дойбы спорт түрін дамытып, жастарға кеңінен насихаттау.
Бірнеше бөлімнен тұрған семинарға алыс-жақыннан келген мәртебелі меймандар алдымен дөңгелек үстелде бас қосты. Спорттық шеберлік мектебінің директоры Сейсен Масалимовтың төрағалық етуімен өткен жиында дойбы спортының арғы-бергі тарихы туралы кеңінен сөз болды. Сейсен Ешенғазыұлынан кейін сөз алған республикалық дәрежедегі төреші, қосымша білім беру педагогі Дәрібай Таукенов дойбының Семей өңіріндегі тарихы туралы баяндама жасады. Басқосу барысында дойбы спортының майталмандары шеберлік сағатын өткізіп, семинарға қатысушылар өзара тәжірибе алмасты.
Семинардың келесі бөлімдерінің бірінде дойбыдан спорт шеберлігіне үміткер, қосымша білім беру педагогі Жарас Исаханов «Комбинациялық ойын тәсілдері» атты ашық сабақ өткізді. Ал дойбыдан бірнеше дүркін Азия және Қазақстан чемпионы Юлия Рынгач жаппай сеанс ойынын көрсетті. Яғни бір мезгілде семинарға қатысушылардың әрқайсысымен кезек-кезек дойбы ойнап, өзінің шеберлігін танытты. Одан кейін қосымша білім беру педагогтарының ұйымдастыруымен, спорттық шеберлік мектебінің тәрбиеленушілерінің қатысуымен «Дойбы әлеміне саяхат» деп аталатын әдеби-сазды көрініс пен жанды дойбы ойыны өтті. Бұл бөлім қонақтардың назарын аудартпай қоймады. Еденге салынған жүру алаңында әр оқушы дойбының бір-бір тасының рөлін атқарып, әдемі ойын өрнегі көрсетілді.
Спорттық шеберлік мектебі директорының оқу-әдістемелік жұмысы жөніндегі орынбасары Әсел Ракишеваның айтуынша, мұнда республикалық семинардың өткізілуі бірінші рет емес көрінеді. Өткен жылы тоғызқұмалақ спортына арналған республикалық деңгейдегі семинар өткенін айтқан Әсел Ракишева қалалық шаралардың ұдайы өткізіліп тұратынын тілге тиек етті.
Айта кету керек, қалалық білім бөліміне қарасты спорттық шеберлік мектебі өткен жылдан бері жұмыс істеп келеді. Қаладағы № 42 мектептің базасында орналасқан мекемеде 35 адам жұмыспен қамтылған, оның 30-ы педагог мамандар. Спорттық шеберлік мектебінде дойбы, тоғызқұмалақ, шахмат, үстел теннисі, қол күрес, қазақ күресі, гір көтеру спорт түрлері бойынша оқушыларды спортқа баулу үйірмелері бар. Жалпы, қала бойынша 1300-ге жуық оқушы осы спорттық шеберлік мектебінде тәлім алуда. Мұнда, жаттығу залдарымен қатар, интерактивті тақтамен, заманауи құрылғылармен жабдықталған ақпараттық-технологиялық дәрісхана да жұмыс істейді. Онда компьютермен дойбы, тоғызқұмалақ, шахмат сияқты тақталы ойындарды ойнауға мүмкіндік мол. Спорттық шеберлік мектебінің директоры Сейсен Масалимов пен оның орынбасары Әсел Ракишеваның және әдіскер Айгүл Қуанованың бастамасымен түрлі шаралар ұйымдастырылып тұратын көрінеді. Соған орай жұмыс нәтижесі де жаман болмаса керек. Бұл жерде тәлім алушы оқушылар республикалық, облыстық, қалалық жарыстарда топ жарып, біршама жетістіктерге жеткен. Олардың алар асулары әлі де алда екендігін айтады ұстаздары.
Семинар соңында қатысушыларға арнайы сертификаттар табыс етіліп, аталмыш шараны өткізуге атсалысқан педагогтар мен оқушылар мақтау қағаздарымен марапатталды. Өз салалары бойынша мол мағлұматқа қанық болып, ерекше әсер алғандықтарын айтқан семинарға қатысушылар спорттық шеберлік мектебінің ұжымына, осындай тағылымды шараны ұйымдастырғаны үшін, зор ризашылықтарын білдірді.
Нұрдәулет КӘКІШЕВ,
«Семей таңы»
