Қаламы қарымды қаламгер, «Семей таңы» газетінің ардагері Қабидолла Шотановтың “Өмірден өрдім өлеңді” атты жаңа кітабы жарыққа шықты. Қаламгер кітабының тұсаукесері қалалық орталық кітапханада өтті.
{jcomments on}Жетпістің бесеуіне келген ақынның кезінде табан аудармай 20 жыл бойы қазақ баспасөзінің қара шаңырағы «Семей таңы» газетінде табысты еңбек еткенін, тарихи басылымда әдеби қызметкер, бөлім меңгерушісі, редактордың орынбасары қызметтерін атқарғанын оқырман қауым жақсы білуге тиіс. Сонымен қатар қаламы қарымды қаламгер облыстық телерадиохабарлар комитетінде, мәслихатта кеңесші маман қызметтерін атқара жүріп, аудармашылықпен де айналысқан. “Өмірден өрдім өлеңді” деп аталатын авторлық туындысы да алғашқы кітабы болмаса керек. Қаламгердің одан бұрын жарық көрген адам мен заман, қоғам жайлы ой қозғаған “Толғаныс толқынында” деп аталатын тағы бір кітабы 2014 жылы кітап сөрелерінен орын алған екен. Ал «Өмірден өрдім өлеңді» атты кітаптың тұсаукесері қалалық орталық кітапхана ұжымының ұйымдастыруымен өтті. Кітапхана қызметкері Жанат Советқызының жетекшілік етуімен өткен шараға қалалық мәдениет және тәлдерді дамыту бөлімінің басшысы Б.Көпбаев пен қалалық жер қатынастары бөлімінің басшысы С.Медеуов, қалалық Мәдениет сарайының директоры Н.Иманбаев, ҚР еңбек сіңірген мәдениет қайраткері, ҚР Композиторлар одағының мүшесі, сазгер, актер С.Әшімбеков, Қазақстанның еңбек сіңірген мәдениет қайраткері, көптеген ән сайыстарының жеңімпазы, әнші Б.Сағымбаева және Қабидолла Шотановтың өзі қызмет атқарған басылым – «Семей таңы» газетінің ұжымы мен зерделі зейнеткердің замандас достары, зиялы қауым өкілдері, жастар қатысты. Кітапхана қызметкері өзінің кіріспе сөзінде поэзия әлеміне із қалдырып, өзіндік үлкен өнер, өрнек тудырған, терең сырға, ұшқыр қиялға толы өлең дүниесін кейінгі ұрпаққа арнап жазған Қ.Шотановтың өмір жолы жайында және оның әдеби жанрдың барлық түрін меңгергені туралы әңгімелеп өтті.
Шара барысында сөз алғандар ақынға деген өздерінің ізгі тілектерін білдіріп, сыйлықтарын табыс етті. Сонымен қатар орталық кітапхананың тұрақты оқырмандары, қалалық, облыстық және республикалық жыр мүшәйраларының жүлдегерлері Арман Шеризат, Бауыржан Игілік, Қуат Қиықбай сынды жас ақындар да өздерінің ойларын ортаға салып, арнауларын оқыды.
Шара барысында ҚР еңбек сіңірген мәдениет қайраткері Баян Сағымбаева Қ.Шотановтың сөзіне жазылған С.Әшімбековтың «Келші, құрбым» атты әнін шырқады. Ал М.Төлебаев атындағы музыкалық училищенің студенті Архат терме орындады. Өз кезегінде сөз алған автор туындысы жайлы әңгімелеп өтті. Шара соңында оқырмандарға «Шежіреге толы туған өлке» атты кітап көрмесі ұсынылды.
Гүлім КЕҢЕСХАН,
Семей қаласы.
