Үкіметтің кеңейтілген отырысында сөйлеген сөзінде Елбасы Н.Назарбаев отандық экономиканың қазіргі ахуалы мен оны әрі қарай дамыту шараларына кеңінен тоқталды. Елбасы атап өткендей, қаржылық саяси дағдарыстар мен текетіреске қарамастан, Қазақстан өзінің дұрыс даму жолымен келе жатқаны ешкімге талас тудырмайды.
{jcomments on}Отырыста Мемлекет басшысы қазіргі уақытта елге жаңа жағдайға бейімделу керек болатынын, ол үшін экономикалық және заңнамалық сипаттағы жедел шаралар қажет екенін атап айтты. Осыған байланысты Қазақстан Президенті әкімдердің алдына бірқатар міндеттер қойды.
Елімізде кең ауқымды реформалардың тиімді жүргізіліп, нақты іс-шаралардың кешенді атқарылуы нәтижесінде тұрғындардың өмір сапасы айтарлықтай жақсарды. Алда халық алдындағы әлеуметтік міндеттемелерді мүлтіксіз орындау сияқты зор міндеттер тұр. Ол дегеніміз – жаңа жұмыс орындарын ашу, орынсыз қысқартуларға жол бермеу, өңірлік бағдарламаларды дәйектілікпен жүзеге асыру, азық-түлік өнеркәсібін, шағын және орта бизнес саласын өркендету, отандық өнімдердің түрлерін көбейту, бәсекелестік қарымын арттыру деген сөз. Бұл ретте барлық буындағы әкімдерге айрықша жауапкершілік жүктелетіні, ерекше талап қойылатыны сөз болды.
«Басқарудың барлық буындары, Президент Әкімшілігінен аудандық әкімдіктерге дейін, барлық министрліктер, ұлттық компаниялар шығындарды қысқарту мүмкіндігін қарастыруы қажет. Мемлекеттік қызметшілердің жұмысы мемлекеттің қаржысын таныстарының, достары мен туыстарының фирмаларына үлестіретін бизнеске айналмауға тиіс. Қазір ел азаматтары атқарушы биліктен нақты және тиімді жұмыс күтіп отыр. Үкіметтің әрбір мүшесінің, әрбір әкімнің міндеті – білек сыбанып жұмыс істеу. Сіздер үшін сын сағаты туды. Қаржыны игеру, жұмыс орындарын ашу талап етіледі, олай болмаған жағдайда, орынды босатқан жөн», – деп қадап айтты Елбасы. Олай болса, мемлекеттік қызметшілер мен ұлттық компаниялардың қызметкерлері қарапайымдылық пен үнемшілдіктің үлгісін көрсетуі қажет. Мемлекет басшысы айтқандай, еліміз сонда ғана барлық қиындықтарды сәтті және сенімді еңсереді.
Рамиль САГАНДЫКОВ,
Көкпекті ауданы әкімінің міндетін атқарушы.
