Semeytany.kz — Бүгін Абай атындағы қазақ музыкалық-драма театрында «Белгісіз бағыт» спектаклінің премьерасы өтті. Қойылымды облыс әкімі Берік Уәли, зиялы қауым өкілдері мен құқық қорғау органдарының басшылары тамашалады.
Шығарма авторы – ақын Мерей Қарт. Спектакльдің өзегі – терроризм мен экстремизмнің қоғамға төндірер қатері және оған қарсы қоғамдық иммунитет қалыптастыру қажеттігі. Қойылымда сауаты төмен, өмірлік тәжірибесі аз, нанғыш жастардың теріс ағымға еріп кету қаупі шынайы көрсетіледі: ешбір жас болашағын құрдымға жіберуді мақсат етпейді, алайда оларды адастырып, мақсаттарына пайдаланатын күштер бар екені айқын аңғарылады.
Премьера көрерменді бейжай қалдырмай, ортақ жауапкершілікке шақырады: жастарға дер кезінде дұрыс бағдар беру, ақпараттық-түсіндіру жұмыстарын күшейту – бүкіл қоғамның міндеті. Театр ұжымы бұл туындының негізгі миссиясы – ой салу, сақтандыру және жастарды теріс ықпалдардан қорғау екенін атап өтті.
