Семейдегі құс етін өндірумен айналысатын «Шығыс Бройлер» ЖШС дамудың даңғыл жолында. Кәсіпорын 2012 жылдан бастап бройлерлік бағытқа бет бұрған. Бүгінгі күні «Шығыс Бройлер» ЖШС—нде құс сою цехы мен жаңа инкубатордың құрылысы аяқталу алдында. Бұған қоса Индустрияландыру картасын өзектендіру бойынша қазіргі заманауи үлгідегі инновациялық шетелдік құрылғылар сатылып алынған. Атап айтсақ, фабрикадағы алдыңғы қатарлы «Pas Reform» инкубациялау құрылғысы мен EMF неміс фирмасының бройлерді сою құрал—жабдығы сапалы өнім алуға мол мүмкіндік береді.
{jcomments on}«Шығыс Бройлер» ЖШС директоры Дәурен Айсариевтің айтуынша, барлық құрылғыларды іске қосу арқылы өнім өндіру көлемін біршама арттыруға және өнім сапасын көтеруге болады.
— Елбасымыз Нұрсұлтан Назарбаевтың Үкіметтің кеңейтілген отырысында отандық кәсіпорындарды қолдау қажеттігін атап көрсетіп, тапсырма бергені мәлім. Соған орай «Қазақстанда жасалған» шарасының басталуы шығыс-қазақстандық тауар өндірушілерді де қуантып отыр. «Шығыс Бройлер» құс фабрикасы 2012 жылдан бері сапалы, экологиялық таза өнімдерді шығаруға бағыт алып келеді. Кәсіпорында 360 адам тұрақты жұмыспен қамтылған. Айына 450 тонна тауық етін өндіреміз. Қазір фабрикада 420 мың тауықтың басы бар. Елбасы айтқан «Қазақстанда жасалған» акциясы аясында тауық етіне арналған жаңа қаптамалар шығарып жатырмыз. Онда «Қазақстанда жасалған» деп жазылатын болады. Алдағы бір айда жаңа қаптама шығып қалуы мүмкін, — дейді кәсіпорын басшысы.
Фабрикаға мемлекет тарапынан да айтарлықтай көмек көрсетіліп келеді. Субсидия мен «Даму» кәсіпкерлікті дамыту қоры» арқылы төмен пайызбен несие алған. Кәсіпорын өнімдері Батыс Қазақстан, сондай-ақ Ақтөбе, Атырау, Шымкент, Тараз, Алматы қалаларына шығарылады. Өнімді жарнамалау жұмысы да жандандырылған.
Фабрика өткен жылы 5 мың тонна құс етін өндірген. Ал биылғы жылы жоғарыда аталған жаңа сою цехы құрылысы аяқталғаннан кейін, өнімді жылына 8 тоннаға дейін арттыру көзделуде. Бұл, өз кезегінде, қосымша тағы 40 адамға тұрақты жұмыс орындарын ашуға мүмкіндік бермек. Айта кету керек, фабрика жұмысшыларының жалақылары тұрақты және уақтылы берілуде.
— Елбасының, барлық сауда желілерінде отандық тауарлар секциясы пайда болу үшін, «Қазақстанда жасалған» акциясына бастама бергені кәсіпкерлерге үлкен қолдау болып отыр. Мемлекет басшысы айтқандай, қазір барша азаматтар патриот болуы керек. Сонда ғана еліміз өркендей түспек. Өздеріңіз білесіздер, қазір өзге елдерден құс еттері көптеп келуде. Бұл, өз кезегінде, отандық өнімге кері әсерін тигізеді. Сонымен қатар олардың хи-миялық қоспалары көп. Оның үстіне Ресей мен АҚШ-тан келіп жатқан өнімдерге қарағанда, отандық құс етінің сапасы әлдеқайда жоғары. Алдағы уақытта Елбасының бастамасы арқасында отандық өнімдерге деген сұраныс артады деген сеніміміз мол, — деп түйді өз сөзін «Шығыс Бройлер» ЖШС директоры Дәурен Айсариев.
Асан МЫРЗАХАНОВ,
«Семей таңы»
