Semeytany.kz — Абай облысында «Ұстаз – ұлттың шамшырағы» атты салтанатты жиын өтіп, шараға аймақ әкімі Берік Уәли, ардагер ұстаздар және 500-ге жуық педагог қатысты.
Аймақ басшысы ұстаздарды кәсіби мерекемен құттықтап, жас ұрпақ тәрбиесіндегі еңбектеріне жоғары баға берді. Ол Мемлекет басшысы Қасым-Жомарт Тоқаевтың құттықтауындағы ұстаз мәртебесіне қатысты ойларын атап өтіп, білімді ұрпақ қалыптастыруда мұғалім еңбегінің маңызын айтты.
Жиында бірқатар педагогтер мемлекеттік және салалық наградалармен марапатталды. Абай ауданы Шәкір Әбенов атындағы мектептің физика пәні мұғалімі Венера Байбекова «Құрмет» орденін алды. Шар қаласындағы Абай атындағы мектеп-балабақшасының директоры Меруерт Бейсембаева «Ерен еңбегі үшін» медалімен марапатталды. Сондай-ақ облыс мұғалімдеріне Оқу-ағарту министрлігінің «Еңбек ардагері» медалі, «Ыбырай Алтынсарин», «Білім беру ісінің құрметті қызметкері» төсбелгілері, Құрмет грамоталары және облыс әкімінің Алғыс хаттары табысталды.
«Ұстазға алғыс!» апталығы аясында аймақ басшысы Астанада тұратын өз ұстазы Зәйтуна Мұқажанованы арнайы құттықтады. Сонымен бірге Семейдегі Геологиялық барлау колледжінің ағылшын тілі оқытушысы Айгүл Омарбекова мен М.Төлебаев атындағы музыка училищесінің оқытушысы Гүлжанат Кәрімова Президент Жарлығымен «Ерен еңбегі үшін» медаліне ие болды.
Қазіргі таңда Абай облысында 16 мыңнан астам педагог еңбек етеді. Өңір құрылғаннан бері 8 ұстаз республикалық деңгейде «Үздік педагог» атанса, 30 мұғалім облыстық марапатқа ие болған. Жас мамандарды қолдау мақсатындағы «Жас педагог» бағдарламасы шеңберінде 780-нен астам жас мұғалім жұмыспен қамтылып, тәлімгерлік көмек алуда. 41 тірек мектебі мен 149 шағын жинақты мектеп «Ауыл мектебі – сапа алаңы» жобасымен қамтылып, 1085 педагогтің біліктілігін арттыру жоспарланған.
