Semeytany.kz — Аягөз қаласындағы орталық аудандық аурухана жанынан 10 төсекке арналған жаңа реанимация бөлімшесі бой көтерді. Нысанның құрылыс барысымен облыс әкімі Берік Уәли танысты.
Аудандық аурухана 1976 жылдан бері жұмыс істейді. Қазір мұнда 220 төсек-орындық стационар мен ауданға қарасты емдеу мекемелері халыққа қызмет көрсетеді. Ұжымда 800-ге жуық адам еңбек етеді, тіркелген тұрғындар саны 50 мыңға тартады.
Жаңа реанимация бөлімі 2024 жылы басталған «Ауылдық денсаулық сақтауды жаңғырту» ұлттық жобасы аясында салынды. Бұған дейін реанимациялық көмек аурухананың бейімделген бөлмесінде көрсетілсе, енді оқшауланған палаталар, диализ бөлмесі, бейнебақылау жүйесі, қан сақтау қоймасы және дәрігерлерге арналған қосымша бөлмелер қарастырылған.
Бөлімше заманауи медициналық техникамен жабдықталмақ: жасанды тыныс алдыру аппараттары, мобильді рентген, жоғары сапалы УДЗ, видеофибробронхоскоп, дефибрилляторлар және өзге құрылғылар орнатылады. Бұл реанимациялық көмектің сапасын едәуір арттырып, науқастарға дер кезінде әрі білікті көмек көрсетуге мүмкіндік береді. Жылына шамамен 500 науқас, оның ішінде 60-қа жуық бала ем қабылдайды. Алдағы уақытта ауруханаға магнитті-резонанстық томограф қою үшін жапсаржай салу жоспарланған.
Нысанды аралаған аймақ басшысы Берік Уәли жаңа бөлімшенің аудан тұрғындары үшін маңызын атап өтті: реанимация дәрігерлердің кәсіби мүмкіндігін кеңейтіп, тұрғындарға сапалы медициналық көмек уақтылы көрсетілуіне жол ашады.
