Semeytany.kz — Шығыс Қазақстан облысының Ұлан ауданындағы Бозанбай ауылында көркем Бүркіт төбенің баурайында «Шығыс Салбурыны-2025» V мерейтойлық халықаралық фестивалі ашылды. Шараға Моңғолия, Ресей, Венгрия, Қырғызстан, Испания және өзге де елдерден қатысушылар келді.
Фестивальдің ресми қонақтарының қатарында ҚР Туризм және спорт министрлігінің мемлекеттік жаттықтырушысы Базарбек Күнтуған, Республикалық құсбегілер федерациясының вице-президенті Бағдатхан Мүптекеқызы, Моңғолиядан келген атақты бүркітші Айшолпан Нұрғайып және халықаралық этномәдени ұйымдардың өкілдері бар.
Этноалаңда 30-дан аса киіз үй тігілген этноауыл жұмыс істеп тұр. Мұнда шеберлік сабақтары, қолөнер көрмелері өтіп, «Ашамайға мінгізу», «Беташар», «Тұсау кесу», «Қырқынан шығару», «Бесікке салу», «Сырға салу» секілді қазақтың салт-дәстүрлері көпшілікке көрсетілуде.
Басты тартыс – жыртқыш құстармен аң аулайтын құсбегілер сайысы. Сонымен бірге тазы жарысы, көкпар және көшпелі мәдени мұраны дәріптейтін өзге де ұлттық ойындар ұйымдастырылған.
Фестиваль қазақтың салт-дәстүрін насихаттауға, этнотуризмді дамытуға және елдер арасындағы мәдени байланыстарды нығайтуға серпін беруді көздейді.
