Semeytany.kz — Семей қаласында алғаш рет қала әкімі тікелей сайлау арқылы анықталып жатыр.
Аймақ басшысы Берік Уәли қала тұрғындарымен бірге Медициналық университетте орналасқан №93 сайлау учаскесіне келіп, өз таңдауын жасады. Облыс әкімі бұл күннің Семей үшін тарихи мәні бар екенін атап өтіп, Мемлекет басшысы Қасым-Жомарт Тоқаев бастамашы болған саяси реформалардың іс жүзінде жүзеге асып жатқанын айтты. Оның сөзінше, тұрғындардың белсенді қатысуы саяси мәдениеттің өсіп, қаланың тағдырына деген жауапкершіліктің артқанын көрсетеді.
Қала аумағында барлығы 129 сайлау комиссиясы жұмыс істеп тұр: оның 1-і – аумақтық, 128-і – учаскелік. Сайлаушылар саны 220 761 адамды құрайды. Учаскелер пандустармен, тактильді бағыттағыштармен және арнайы белгілермен жабдықталған.
Дауыс беру сағат 07:00-де басталып, 20:00-де аяқталады. Облыс орталығын басқаруға үш үміткер түсіп жатыр.
