ородулиха ауданының әкімі Григорий Акулов тұрғындармен есептік кездесуін өткізді. Жиын барысында ауданның 2014 жыл-ғы әлеуметтік-экономикалық даму көрсеткіштері мен алдағы жұмыс жоспары туралы айтылды. Аудан басшысы әртүрлі салалар бойынша атқарылған жұмыстар жайлы мәлімет берді.
{jcomments on}Өз сөзінде аудан басшысы өткен жылдың басты оқиғасы Қазақстан Республикасының Президенті Нұрсұлтан Әбішұлы Назарбаевтың «Нұрлы жол- болашаққа бастар жол» атты Жолдауы жайлы айтып өтті. — Біздің негізгі мақсатымыз — экономиканың дамуы үшін жаңа мүмкіндіктер жасау. Ауданда барлық салалар бо-йынша көрсеткіштердің тұрақты өсімі байқалуда. 2014 жылы аудан бюджетіне 3 миллиард 403 миллион теңге түсті. Субвенциялар мен мақсатты трансферттердің көлемі 2 миллиард 482,6 миллион теңгені құрады. Аудан бюджетінің орындалуы кіріс бойынша 100,3 пайыз, шығыс бөлігі бойынша 100 пайыз болды,- деді Григорий Иосифович.
Аудан басшысы ауыл шаруашылығы мен өндіріс салаларының дамуы жайлы айтып өтті. Ауыл шаруашылығы мақсатында пайдаланылатын жер көлемі 451 710 гектарды құрап отырған көрінеді. 488 ауылшаруашылық бірлестіктері жұмыс істеуде. Егістік алқабының көлемі былтыр 305,6 мың гектарға жеткен. Техниканың 45 пайызы жаңартылған. Сондай-ақ ауылшаруашылық бірлестіктері өз қаражаттарына 2014 жылы жалпы құны 399 миллион 925 мың теңгені құрайтын 46 астық сақтау қоймасын салған. Мал шаруашылығының даму көрсеткіштеріне келетін болсақ, ауданда ет-сүт бағытындағы асылтұқымды ірі-қара малын өсірумен айналысатын сегіз шаруа қожалығы жұмыс істеуде. Ауылшаруашылық бірлестіктері жалпы саны 640 сиыр малын сатып алған көрінеді.
Тау-кен өндіріс саласында полиметалл кенін өндірумен және өңдеумен айналысатын «Востокцветмет» ЖШС жұмыс істеуде. Аудан аумағында мыс, мырыш және мырыш концентратындағы мыс өндірілуде. Сондай-ақ Григорий Акулов ауданда мемлекеттік бағдарламалар аясында жүзеге асырылған жұмыстар жайлы айта келе, құрылыс саласында, инфрақұрылымды жетілдіру, абаттандыру бағытында атқарыл-ған шаруалар туралы сөз етті. «Ақбұлақ» бағдарламасы шеңберінде Дмитриевка ауылында су құбыры желісінің құрылысы мен Бородулиха ауылындағы су құбыры желісінің екінші кезегі толық аяқталған. Өткен жылы жалпы ауданы 1 786 шаршы метрді құрайтын 12 тұрғын үй пайдалануға берілген. Бірқатар ауылдарда көшелерге жаңа жарық шамдары, қуат үнемдейтін жарық шамдары орнатылған. «Балапан» бағдарламасы жүзеге асырыла бастаған төрт жылдың ішінде мектепке дейінгі ұйымдар желісіндегі нысандардың қатарына 10 нысан қосылған. Осының өзі қосымша 350 баланы қамтуға мүмкіндік берді. Қазіргі таңда аудандағы мектепке дейінгі тәрбие берумен қамту көрсеткіші 100 пайызды құрап отыр.
Өз есебінде аудан әкімі білім беру, денсаулық сақтау салаларындағы, әлеуметтік саладағы жұмыстар жөнінде де айтып өтті. Былтырғы жылы 535 адам еңбекпен қамтылған, олардың 26-сы мүмкіндігі шектеулі жандар. Жалпы, 2014 жылы 419 жаңа жұмыс орны ашылған.
Кездесу барысында спорт саласын дамыту бағытындағы жұмыстар туралы да айтылды. Спорттың дамуына жергілікті бюджеттен 2014 жылы 10003,0 мың теңге бөлінген. Қазіргі таңда 141 спорттық нысан жұмыс істеуде.
Аудан әкімінің есебін тыңдай келе, кездесуге келген тұрғындар аудан басшысының жұмысына оң баға беріп, өздерін толғандырған сұрақтарды қойып, оларға қатысты жан-жақты жауаптар алды.
Мирас ҚҰСАЙЫН,
«Семей таңы»
