Абай аудандық өндірістік телекоммуникация торабы жұртшылықты сапалы әрі үздіксіз байланыс қызметімен қамтамасыз етуде тұрғындардың сенімінен шығып отыр. «Қазақтелеком» АҚ тарапынан ұсынылатын қызметтердің сапасын жақсартып, жеке және заңды тұлғаларды телефонмен және интернетпен қамту деңгейін арттыруда ауқымды жұмыстар атқарып отырған аудандық телекоммуникация торабының бұқара халықтың күнделікті тыныс-тіршілігіндегі қызметі айрықша, алар орны ерекше. Бүгінде Абай аудандық телекоммуникация торабы аудан бойынша 2577 абонентке телефон қызметін көрсетеді.
{jcomments on}2014 жылдың шілде айында «Ақпаратты Қазақстан — 2020» мемлекеттік бағдарламасы мен «CDMA/EVDO радиоқатынау желісі негізінде ауыл байланысының телекоммуникация желілерін жаңғырту мен дамыту» жобасының аясында «Қарауыл-Еңірекей-Аягөз» бағыты бойынша Жарма ауданындағы Еңірекей ауылының жанында биіктігі 60 метрлік антенна діңгегі орнатылды. Радио-релелі байланыс желісінің жабдығы өткен жылдың қараша айында іске қосылып, пайдалануға берілді.
Аталмыш жоба халықтың аз қоныстанған жерлерін және шалғай жатқан ауылдық елдімекендерді телефонмен және интернет желісімен қамту деңгейін барынша жоғарылатуды көздейді. Өйткені радио-релелі байланыс желісінің жабдығы іске қосылмаған кезде, Қарауыл ауылы бойынша интернет желісіне қосылған абоненттер саны 96 ғана болса, ал жабдықты пайдалануға берген күннен бастап бүгінгі күнге дейін интернет желісіне кең жолақты қатынау қызметіне 367 абонент қосылды. Жұртшылық өз өмірін интернетсіз елестете алмайтын заманда, бұл — ауыз толтырып айтарлықтай үлкен жетістік. Бұл да «Қазақтелекомның» көрсетіп отырған қызметінің үлкен сұранысқа ие екендігін танытады.
Қазіргі таңда аудандық телекоммуникация торабында Қарауыл ауылының тұрғындарын интернет желісінің кең жолақты қатынау қызметіне қосу жұмыстары жалғаса түсуде. Бұл орайда Қарауылда телефон қызметін пайдаланушы абоненттердің әрқайсысының интернет қызметіне қосылуға мүмкіндіктері зор.
Өткен жылдың желтоқсан айында аудандық телекоммуникация торабының өз күшімен «Семей-Қарауыл» бағытынан босаған ЗКП 2х4 кабель желісін Қасқабұлақ ауылына қарай тарту кезінде Қасқабұлақ ауылдық округінің абоненттері интернет желісіне қосылуға мүмкіндік алды. Осы құрылыс жұмыстарының арқасында интернет қызметіне 27 абонент қосылды. Бүгінгі күнде осы ауылда интернетке қосылған абоненттердің кең жолақты қатынау қызметінің сапасын жақсарту мақсатында жұмыстар жүргізілуде. Сондай-ақ өткен жылдың желтоқсан айының соңында Қасқабұлақ ауылына қарасты Бөрлі елдімекеніне жер серігі арқылы жұмыс істейтін SkyEdgе жабдығы құрылып, 8 үйге телефон нүктесі жаңадан орнатылыпты.
«Ауылдық елдімекендерді телефонмен қамту» мемлекеттік бағдарламасын жүзеге асыру барысында Абай ауданының ауылдық аумақтары 42 дана негізгі телефон нүктелерімен қамтылды. Жалпы алғанда, Кеңгірбай би және Қасқабұлақ ауылдарының 47 абоненті кең жолақты қатынау қызметі арқылы интернет желісіне қосылды. Аудан көлемінде 2 ауылдық елдімекенде интернет желі-сіне 256 Кбит/с жылдамдықта қатынау үшін және 5 елдімекенде 1000 Кбит/с жылдамдықта қатынау мақсатында SkyEdgе жабдығы арқылы ұжымдық пункттері ұйымдастырылған.
2015 жылы Шығыс Қазақстан облыстық телекомуникация дирекциясының жоспары бойынша Абай ауданында интернет және байланыс желілері қызметінің сапасын одан әрі жақсартып, халықаралық дәрежеге жеткізу мақсатында қашықтығы 186 км «Семей-Қарауыл» бағытына заманауи талшықты-оптикалық байланыс желісін тарту жоспарланып отыр. Аталмыш құрылыс Қасқабұлақ ауылы арқылы жүргізіледі. Мұндай жаңашылдыққа ауысу, өз кезегінде, тұрғындарды «Қазақтелеком» АҚ ұсынатын жаңашыл үлгідегі қызмет түрлеріне, атап айтсақ интернет желісіне жоғары жылдамдықпен қатынауға, сондай-ақ цифрлы «ID TV» теледидарына, ақылды телефон «Id PHONE» қызметіне, қосуға мүмкіндік береді. Сонымен қатар Құндызды ауылындағы аналогты АТС жабдығы цифрлы АТС-ке ауыстырылады.
Абай аудандық телекоммуникация торабының ішкі жоспары бойынша биылғы 2015 жылы Көкбай, Медеу ауылдарының аудан орталығымен қатынау желілері жаңғыртылып, интернет желі-сіне қосу жұмыстары аудандық телекоммуникация торабының өз күшімен жасалмақ. Сонымен қатар Медеу ауылдық елдімекеніне 1000 Кбит/с жылдамдықта қатынаудың ұжымдық пунктін ұйымдастыру үшін SkyEdgе жабдығы үстіміздегі жылдың бірінші жартысында орнатылады деп жоспарлануда.
Абай аудандық өндірістік телекоммуникация торабының бастығы Серік Ғылыммедден өз сөзінде:
— Біздің басты мақсатымыз — аудан тұрғындарына сапалы әрі үздіксіз байланыс қызметін ұсына отырып, қай уақытта болмасын тұтынушыларға қолайлылық тудыру. Қызметіміз осы мақсаттың үдесінен толықтай шыға алып отыр. Алдағы уақытта да, жоспарларымызға сәйкес, халыққа қапысыз қызмет көрсетуде аянбай еңбек етеміз деп ойлаймын,- деді.
Иә, сәтін салып, ғаламтор желісінің қызметіне қол жеткізген ауылдық аға-йынның қуанышында шек жоқ. Өйткені талай жиындарда халықтың басты өтініш-тілегі ретінде ғаламтор мәселесі айтылатын еді. Қарапайым халықты айтпағанда, басты-басты мекемелердің өзінде интернет желісінің жоқтығы болмаса жылдамдығының төмендігі қолбайлау болып, тиянақты жұмыс жасауда өз кедергісін келтіретін. Әр бейнеттің өз зейнеті болатындығы ақиқат қой. Көптен күткен ғаламтор қызметі ауылдағы ағайынның шаттығын арттырды.
Бұлбұл ӘНУАРБЕКҚЫЗЫ
«Семей таңы»
