1979 жылдың 25 желтоқсанынан 1989 жылдың 15 ақпанына дейін он жылға жуық уақыт бойы Кеңес Әскерінің жауынгерлері Ауған аумағында интернационалдық борыштарын өтеді. Жауынгерлік сертіне берік болған Кеңес әскерлерінің Ауғанстаннан шығарылғанына 26 жыл толуына арналып қаһарман жауынгерлерді еске алу шарасы Тарбағатай ауданының орталығы Ақсуатта да аталып өтті.
{jcomments on}Қазақстан Қарулы Күштерін насихаттау, жастар арасында әскери-патриоттық тәрбиені жандандыру және Ауған соғысы ардагерлерінің мерекесін арнайы түрде атап өту мақсатында ұйымдастырылған мерекелік жиынға жергілікті атқарушы билік өкілдері, Ауған соғысына қатысқан интернационалист-жауынгерлер, соғыста қаза тап-қандардың туыстары мен достары, мекеме басшылары, жастар ұйымдарының өкілдері, әскери қызметшілер, запастағы офицерлер, ауыл тұрғындары және мектеп оқушылары қатысты.
Жиында Тарбағатай ауданының әкімі Д.Оразбаев құттықтау сөз сөйлеп, Ауған соғысы ардагерлерінің бейбіт еңбекте ел игілігін молайтуға үлес қосып, жастарға үлгі-өнеге болғандарына, еңбекте көрсетіп жүрген жетістіктеріне тоқталып, ризашылығын білдірді. Интернационалист-жауынгер Нұрғали Жұмажанов пен Серік Ибраев ауданның әлеуметтік-экономикалық дамуына қосқан үлесі үшін аудан әкімінің медалімен марапатталды.
Салтанатты жиында Ауған соғысының ардагері Болат Шакер, К.Нұрбаев атындағы орта мектептің оқушысы Сұлтан Дүйсенғалиұлы құттықтау тілектерін жеткізді. Жиын соңы Ақсуат Мәдениет үйінің өнерпаздарының мерекелік концертіне ұласты. Аудандық қорғаныс істері жөніндегі бөлімі қызметкерлерінің орындауындағы М.Омаровтың «Ант етем» хоры, интернационалист-жауынгер Жаманбаевтың, Құжиманов, Шәкәрімов, Ахметов, Жакилин, Тлеуленовалардың шырқаған әндері көрермендер көңілінен шықты.
Жұмаш ЖЕКЕБАЕВ,
Тарбағатай аудандық қорғаныс істері жөніндегі бөлімінің қызметкері.
