Жуырда Қытай Халық Республикасының Шағантоғай ауданында Үржар ауданының мәдени күндері өтіп, «Жаңа Жібек жолы» жәрмеңкесі ұйымдастырылды. Аталмыш шара облыс әкімі Даниал Ахметовтің аймақтардың экономикасын дамыту және көршілес елдермен саяси-экономикалық қарым-қатынас орнату жөніндегі тапсырмасы аясында жүзеге асырылды.
Үржарлық делегацияны аудан әкімі Серік Зайнулдин бастап, Үржар аудандық «Нұр Отан» партиясының филиалы төрағасының орынбасары Б.Баймұратов, аудан әкімінің орынбасары С.Садуақасов, Мақаншы және Бақты ауылдық округтерінің әкімдері, аудан кәсіпкерлері мен аудан белсенділері, спорт бөлімі мен мәдениет және тілдерді дамыту бөлімінің көркемөнерпаздар ұжымы қостап барды.
Қазақстандық делегаттарды ҚХР Тарбағатай аймағы, Шағантоғай ауданы Коммунистік партиясының бірінші хатшысы Соу И Вей ресми түрде қабылдап, арнайы жиын өткізді. Отырыс барысында Шағантоғай ауданының әкімі Майнұр Жақанқызы мен Үржар ауданының әкімі Серік Зайнулдин Үржар ауданы мен Шағантоғай ауданы арасындағы ауылшаруашылық өнімдерінің саудасын жүргізу, бірлесіп кәсіпкерлік пен өндірісті дамыту, жәрмеңкелер ұйымдастыру және халықаралық мәдени қарым-қатынас орнатуды көздеген шекаралас аудандар арасындағы достық келісімшартына қол қойды.
{jcomments on}Жиында сөз алған аудан әкімі Серік Зинабекұлы:
— Қытай Халық Республикасы мен Қазақстан арасындағы тарихи байланыстардың сонау көне замандар қойнауынан бастау алатыны баршамызға мәлім. Тағдыр екі елдің халықтарының маңдайына қатарласа өмір сүріп, көршілік байланыста болуды жазған. Екі ел халқының ұзақ тарихи достық қатынасы бар. Әлемге әйгілі «Жібек жолы» сол халықтардың қоян-қолтық қатынасын жалғап келеді. Бүгінгі нәтиже Ұлы Жібек жолының қайтадан жұмыс жасай бастауына жаңа серпін беріп, қос елдің кәсіпкерлеріне болашақта бірлесіп жұмыс атқаруына, дамуына үлкен үлесін қосатын болады,- дей келе, ҚХР-мен саяси, экономикалық, мәдени-гуманитарлық және бас-қа да салалардағы жан-жақты стратегиялық әріптестігін дамыту Қазақстанның сыртқы саясатындағы басым бағыттардың бірі екендігін атап өтті. Қазақстанның өзге мемлекеттермен тең құқылы және екі жаққа тиімді қарым-қатынас құруға дайындығы оның бүгінгі күні дипломатиялық байланыс орнатқан шет мемлекеттердің санының көптігімен дәлелденіп отырғандығын да жеткізді.
— ҚХР, Шыңжаң Ұйғыр автономиялы ауданы, Тарбағатай аймағы, Шағантоғай ауданы әкімдігі тарапынан түскен екіжақты достық даму меморандумын қолдап, барынша үлес қосып жұмыс жасаймыз. Аталмыш келісім аясында екі жақтағы да аудандар дамып, көркейіп, елге септігін тигізеріне кәміл сенемін. Атқарар жұмыстардың нәтижесі әлі алда. Сондықтан болашақта өзара ынтымақтастық шеңберінде бірлесіп істеген жұмыстарымыз нәтижелі болып, алға қойған мақсаттарға жетеміз деп сенім білдіремін,- деген пікірін ұсынып, екі елдің түсіністігі мен достығы жалғасын табуын тіледі.
Шара барысында Үржар ауданының мәдениет және тілдерді дамыту бөлімінің басшысы Ж.Андасова бастап барған аудандық Мәдениет үйінің директоры М.Кебиспаева, көркемдік жетекшісі Н.Солтабаева, ҚР-ның мәдениет саласының үздігі Г.Темірбекова, «қайраткері» белгісінің иегері М.Искаков және Н.Черубаев, Қ.Сатмұхамбетов, Г.Сат-мұхамбетова, Р.Чүкенова, А.Желдібаева, Ә.Қаниев, С.Ықыласов, С.Шакенов, Е.Қарымсақов, Т.Оразбаева, Н.Анистратова, Д.Ермеков сынды Мәдениет үйінің әртістерінен құралған өнер ұжымы және ауданның белгілі спорт саласының бапкері С.Алтынбеков бастаған топ, суретші Т.Хабидульдин және «Сонар» ансамблінің бишілер тобы өнерлерін көрсетті.
Бауыржан ЖАҚЫП,
«Семей таңы»
