Бесқарағай ауданындағы №16 кәсіптік колледжі қарамағында 1983 жылдар шамасында құрылыс жұмыстары басталғанымен, қаражаттың жеткіліксіздігінен аяқсыз қалып, ұзақ жылдар бойы қаңырап бос тұрған қоғамдық-тұрмыстық кешенге 2013-2014 жылдар аралығында күрделі жөндеу жұмыстары жүргізіліп, 2014 жылдың қазан айында құрылыс жұмыстары аяқталған болатын. Жақында көп жылдардан соң қайта жаңғырған аталмыш қоғамдық-тұрмыстық кешеннің ашылу салтанаты өткізілді.
{jcomments on}Көптен күткен салтанатты шараға аудан әкімі Нұрлан Сыдықов бастаған атқарушы билік өкілдері, Шығыс Қазақстан облысының мамандарды қайта даярлау және техникалық әрі кәсіптік білім беру орталығының директоры А.Нұрсеитова қатысты. Алдымен жиналған жұртшылық кешеннің ашылу салтанатын тамашалады, кәсіптік колледж директоры Қ.Қайырханов мәртебелі меймандарға екі қабатты кешеннің ішін аралата жүріп, ат-қарылған істің нәтижесімен таныстырды.
— Ғимаратқа күрделі жөндеу жұмыстарын жүргізуге облыстық бюджеттен 68 млн. 830 мың теңге бөлінген болатын. 50 жатын орны бар жатақханада заманауи үлгідегі асхана, үлкен спорт залы, әртүрлі іс-шаралар өткізуге қолайлы акт залы да қарастырылған. Кешеннің сыртқы құрылыс жұмыстарына 2014 жылы 49 млн. 520 мың теңге бөлініп, сыртқы жаққа 8 шам мен қоршаулар орнатылды. Кешенді іске қосуға облыс және аудан басшыларының тарапынан зор қолдау болғанын айтып өткен жөн болар, — дейді Қ.Қайырханов.
Кешеннің шатыры мен электр желілері, ауа баптау жүйесі, жылу және кәріз желісі де жаңартылған. Іші-сырты толықтай жаңа күйге енген қоғамдық-тұрмыстық кешенге 12 адам жұмыс-қа тұрып, шалғай ауылдардан келген оқушылар осы күні алаңсыз оқуға мүмкіндік алғандығы да — қуанарлық жағдай. Тіпті мұнда үлгерімі жақсы студенттерге 13000 теңге мөлшеріндегі шәкіртақы да қарастырылған. Бүгінгі күні аудандағы №16 кәсіптік колледж ұжымында 48 адам жұмыс істеп, 127 студент кәсіптік білім алуда. 9 түрлі мамандыққа баулитын оқу орнында 4 түрлі мамандық бойынша, атап айтқанда тракторшы, ауыл шаруашылығы саласының шебері, аспаз, слесарь мамандары дайындалуда. Өткен жылдарда омарташының бал өндіру ісіне қызығушылық танытқан 25 бала арнайы білім алып, олардың 5-6-ы осы күні өз шаруашылықтарын ашқандығы да сөз арасында айтылды.
Кешеннің ашылу салтанатында саналы ғұмырын еңбекке арнаған, 23 жылдан бері басшылық жасап келе жатқан колледж директоры Қ.Қайырханов 60 жылдық тарихы бар оқу орнының тыныс-тіршілігі, жеткен жетістіктері, алға қойған мақсаттары жайында баяндады. Одан кейін сөз алған мекеменің еңбек ардагерлері В.Островерхов, П.Шапошников өткенге шолу жасап, жастарға бүгінгі қолда барды бағалау қажеттігін айтты. 60 жылдық тарихы бар оқу орнын назарларынан тыс қалдырмай жаңарып, жаңғыруына үлкен қолдау танытып отырған жергілікті билік өкілдеріне ризашылықтарын жеткізді. Өз кезегінде, Шығыс Қазақстан облысының мамандарды қайта даярлау және техникалық әрі кәсіптік білім беру орталығының директоры А.Нұрсеитова көпшілік алдында Қ.Қайырханов бастаған ұжым-ға ізгі тілегін білдіріп, ШҚО білім басқармасының Алғыс хаттарымен кәсіптік колледждің бұрынғы директорлары В.Островерхов пен Х.Мукиновті, Б.Шортанбаевты марапаттады. Сондай-ақ Алғыс хаттар ШҚО әкімінің қоғамдық көмекшісі В.Козинскийге, студенттердің өндірістік іс-тәжірибеден өтулеріне қолдау көрсетіп жүрген шаруа қожалықтарының басшылары Т.Әділов пен Н.Сапарбековке, кадрларды даярлау және қайта даярлықтан өткізуге мүмкіндік жасайтын Жұмыспен қамту және әлеуметтік бағдарламалар бөлімінің басшысы Б.Бата-ловқа да табыс етілді.
Аудан әкімі Нұрлан Сыдықов өз сөзінде біршама жылдардан бері құрылыс жұмыстары аяқсыз қалып, бос тұрған нысанды іске қосып, жас жеткіншектердің алаңсыз білім алуларына бар мүмкіндікті жасап отырған колледж директоры Қ.Қайырхановтың еңбегін ерекше атап өтті. Сонымен қатар аудан әкімі кәсіптік колледж ұжымының білікті маман дайындаудағы еңбектеріне жеміс тілеп, осы оқу орнында ұзақ жылдардан бері қызмет атқарып келе жатқан қызметкерлерді Алғыс хаттармен марапаттады. «Нұр Отан» партиясының аудандық филиалы төрағасының бірінші орынбасары Б.Омаров, аудандық мешіттің бас имамы С.Сасеновтер де, өз кезектерінде, сахна төріне көтеріліп, жүректен шыққан ең ізгі тілектерін жеткізді. Салтанатты шара аудандық Мәдениет үйінің көркемөнерпаздарының концерттік бағдарламасымен аяқталды.
Әсел ҚАСЫМҒОЖИНА,
«Семей таңы»
