Semeytany.kz — Облыс әкімі Берік Уәли Семей қаласындағы «Шығыс ШПЗ» ЖШС базасында салынған жаңа өндіріс орнының дайындығымен танысты.
Кәсіпорында OSB плиталары мен фанера өндіруге арналған цехтардың құрылысы толық аяқталып, негізгі жабдықтар орнатылған. Қазір іске қосу алдындағы реттеу және тексеру шаралары жүргізілуде. Жоба құны – 2 млрд теңге, зауыт іске қосылғаннан кейін 70–80 адам тұрақты жұмыспен қамтылады.
Кәсіпорын жыл соңына дейін өндірісті жолға қойып, 20-ға жуық өнім түрін шығаруды жоспарлап отыр. Сонымен қатар шетелдік инвесторлармен бірлесіп, 700 шаршы метр аумақта ламинация цехын кеңейту жобасы қолға алынған. Осы мақсатта компания басшылығы өндірісті кеңейту үшін жер учаскесін бөлуге қолдау көрсетуді сұрады.
Аймақ басшысы Берік Уәли өңірге заманауи өндіріс орындарының қажет екенін атап өтіп, «Ең бастысы, жаңа жұмыс орындары ашылып, жергілікті өнімнің үлесі артады. Біз инвесторларға жан-жақты қолдау көрсетіп, өндірістің тұрақты дамуын қамтамасыз етеміз», – деді.
Қазіргі таңда зауытты іске қосуға қажетті соңғы дайындықтар жүріп жатыр, жоспар бойынша кәсіпорын биылғы жылдың соңына дейін өнім өндіруді бастайды.
