Семей қаласы әкімінің орынбасары Зәуреш Исабаеваның төрағалық етуімен әйелдер ісі және отбасы-демографиялық саясат жөніндегі қалалық комиссияның ағымдағы жылғы алғашқы отырысы болып өтті.
{jcomments on}Жиында Қазақстанның «Нұрлы жол» атты Жаңа Экономикалық Саясатын жүзеге асыруда комиссияның рөлі, халық-аралық әйелдер күні мерекесіне дайындық шаралары және 2015 жылы атақарылатын жоспарлы жұмыстары сынды бір-қатар мәселелер қаралды. Әйелдер ісі және отбасы-демо-графиялық саясат жөніндегі қалалық комиссияның отырысына саяси партиялар, азаматтық қоғам институты, қалалық мәслихат депутаттары, кәсіпорындар мен ұйымдар басшылары, сондай-ақ БАҚ өкілдері қатысты.
Семей қаласы әкімдігі жанындағы әйелдер ісі және отбасы-демографиялық саясат жөніндегі комиссияның алғашқы отырысы Елбасының «Нұрлы жол» атты Жаңа Экономикалық Саясатын жүзеге асырудағы рөлін талқылаудан басталды. Семей қаласы ішкі саясат бөлімінің басшысы Айдар Садырбаев өз баяндамасында «Нұрлы жол – болашаққа бастар жол» Жолдауында қойылған негізгі міндеттерді орындаудың маңыздылығына тоқталып, Жолдаудың экономикалық бағытқа басымдық бере отырып жасалғандығын еске салды. Бөлім басшысы қалалық әйелдер ісі кеңесі мемлекеттік бағдарламаны дәріптеп қана қоймай, оның жүзеге асуына атсалысуы керек екенін атап өтті.
— Семей қаласы экономикасын, негізінен, шағын және орта бизнес құрайды және аталған салада көптеген кәсіпкер әйелдер қауымы жұмыс жасауда. Айта кету керек, бүгінде олар өңір экономикасының дамуына айтарлықтай үлес қосып келеді. Нәзік жандылар әлеуметтік салада да жетерлік. Алайда біз шаһарда гендерлік саясатты әлі де болса ойдағыдай жүзеге асырып, ел экономикасының дамуына күш салу үшін бірлесе жұмыс жасауымыз керек, — деді.
Бөлім басшысы сондай-ақ 2015 жылы Қазақстанда үлкен шаралардың тізбегі күтіп тұрғанын, сондықтан кеңес мүшелерін Қазақ хандығының 550 жылдығы, Қазақстан халқы Ассамблеясы мен ҚР Конституциясының 20 жылдығы, Жеңістің 70 жылдығы және Абай Құнанбайұлының 170 жылдығы сынды айтулы шараларға атсалысуға шақырды. Бұл ретте Айдар Садырбаев әйелдер қауымына қаланың қоғамдық өміріне белсенді араласып, ұлтаралық және конфессияаралық келісімді нығайту, Қазақстан халықтарының рухани адамгершілік құндылықтарын дамыту бағытында жұмыстарды белсенді жалғастыру керектігін жеткізді.
Жиында Әйелдер ісі және отбасы-демографиялық саясат жөніндегі кеңес мүшелері көктемнің алғашқы күндерінде аталып өтілетін ең жарқын мерекелердің бірі – 8 наурыз халық-аралық әйелдер күні мерекесіне дайындықты бастау керектігін сөз етті. Көктем мерекесін ерекше атап өтуді талқылаған комиссия мүшелері барлық жоспарларымен бөлісіп, ағымдағы жылы соғыс ардагерлеріне ерекше көңіл бөлінетінін атап өтті.
Алқалы жиында аталмыш комиссияның ағымдағы жылы атқаратын жұмыс жоспары да сөз болды. Комиссияның келесі отырысы алдағы тоқсанда өткізілмек. Мамыр айында әйелдер мен шағын отбасы кәсіпкерлігін дамыту мәселесі және балаларды қорғау күніне жоспарлар талқыға салынбақ. Сондай-ақ көпбалалы отбасыларындағы мүмкіндігі шектеулі жандар мен халықтың әлеуметтік жағынан аз қамтылған отбасылар мәселесі сөз болмақ. Ал комиссияның соңғы отырысы желтоқсан айына жоспарлануда. Онда әйелдердің құқығын қорғау, отбасындағы әйелдер зорлық-зомбылығының алдын алу мәселелері талқыланбақ.
Асан МЫРЗАХАНОВ,
«Семей таңы»
