Елбасы Нұрсұлтан Әбішұлы Назарбаев үкіметтің кеңейтілген отырысында жаһандық дағдарыс жағдайында елімізде жүзеге асырылуы тиіс экономикалық саясат аясындағы нақты шаралар жөнінде айтты. Үкімет мүшелері мен әкімдерге бірқатар тапсырмалар жүктеді. Соның ішінде бірінші кезекте инвестиция тартып, жаңа жұмыс орындарын ашу мәселесіне баса назар аударды. Бұл орайда «Нұрлы жол» бағдарламасы дағдарысқа қарсы тиімді құрал болып табылатынын да атап өтті. Елбасы сондай-ақ аталмыш стратегиялық құжатты толықтырып, қолдау шараларының аясын кеңейту қажеттігіне тоқталды:
{jcomments on}- Бұлардың қатарында отандық машина жасау саласын және экспортшыларды қолдау, шағын және орта бизнес кәсіпорындары үшін инфрақұрылымдар жүргізу, АӨК-ні мемлекеттік қолдауды ұлғайту, ішкі нарықты қорғау шаралары және басқа да бағдарлар бар,- деді Президент.
Елбасының Үкіметтің кеңейтілген отырысында айтқан сөздерінің барлығы елімізде осы уақытқа дейін атқарылып келе жатқан әлеуметтік және экономикалық шаралармен толық үндесіп, сабақтастық тапқан. Соның бір мысалы — өңірлерде жұмыспен қамтылуға ықпал ету бағдарламалары дайындалуы қажет екенін айтуы. Бұдан бөлек Президент заманауи инфрақұрылымды қалыптастыруда жұмыс қарқынын үдету керектігін ескертті. Агроөнеркәсіп саласын, ауыл шаруашылығын дамыту мәселесіне назар аударды. Елімізде бизнестің өркендеуіне барлық мүмкіндіктер жасалғанын айта келе, аталмыш сектордың алдағы уақытта да қажетті ресурстармен қамтамасыз етілетінін атап өтті.
«Үкіметтің әрбір мүшесінен, әкімдерден нақты нәтижелер талап етіледі»,- деді Елбасы Нұрсұлтан Әбішұлы Назарбаев.
Үкіметтің кеңейтілген отырысында Президенттің айт-қан сөздерінің жалпы мазмұны елімізде уақытша кедергілерді жеңіп шығуға қажетті мүмкіндіктердің бәрі бар дегенге саяды.
Мемлекет басшысының жүктеген тапсырмаларының дер кезінде нәтижелі орындалуына атсалысуды өзімнің аудан басшысы ретіндегі қызметтік міндетім ғана емес, Қазақстанның патриоты ретіндегі азаматтық парызым деп білемін. Себебі Елбасының көрсеткен жоспарларының көздегені еліміздің әлеуметтік-экономикалық тұрғыда дамуының қарқынын бәсеңдетпеу. Қазіргі таңда Аягөз ауданында Президент айтқан тапсырмаларды орындау бойынша шаралар қолға алына бастады. Аталмыш шаруалардың жемісті жүзеге асуы үшін мұқият әрі ыждаһатты жұмыс атқарылмақ. Мемлекет басшысы жүктеген міндеттердің дер кезінде, сапалы орындалуы еліміздің дамуының қарқынын сақтауға септігін тигізетініне сенім мол.
Бақытжан БАЙАХМЕТОВ,
Аягөз ауданының әкімі.
