Қазақстан халқы Ассамблеясының отырысында биылғы жылы Президент сайлауын өткізу жөнінде шешім қабылданып, халыққа ұсыныс жасалды. Бұл өте орынды және дер кезінде жасалған маңызды ұсыныс деп есептеймін. Өйткені Қазақстан Тәуелсіздік алған 1991 жылдан бүгінгі күнге дейін 23 жыл уақыт өтіпті. Осы 23 жылдың ішінде Елбасымыз Н.Назарбаевтың сарабдал саясатының, білікті басшылығының арқасында ғасыр көлемінде атқарылатын жұмыстар істелді.
{jcomments on}1991 жылы Тұңғыш Президент болып сайланып, ел тізгінін қолға алғанда, Нұрсұлтан Әбішұлына да оңай тимегені анық. Өйткені империялық КСРО тарап, экономикалық байланыстар үзілді. Қазақстанның экономикасы тек қана шикізатқа негізделгендіктен, өндіріс орындары болмады. Алайда «енді не істейміз?» деп халықты үрей билеген уақытта, Елбасы «Алдымен экономика, содан кейін саясат» деп, өзінің тарихи бағытын ұсынып, іске кірісті. 1997 жылы халыққа «Қазақстан – 2030» Стратегиясын жолдады. Бүгінгі күні осы бағыттың дұрыс екендігін күнделікті өмірден көріп отырмыз. Экономикамыз қарыштап дамып, елдің жағдайы жақсарды. «Қазақстан – 2030» стратегиясы мерзімінен бұрын орындалып, дамыған 50 елдің қатарына ендік.
Қазақстанды бүкіл әлем елдері, оның ішінде ұлы державалар Америка, Қытай, Ресей мемлекеттері, Еуропа елдері, мойындап, Елбасымыз Нұрсұлтан Әбішұлы Назарбаевтың пікірімен санасатын болды. Мұны Президентіміздің өлшеусіз әрі жанкешті еңбегінің нәтижесі деп білеміз.
Нұрсұлтан Әбішұлының ең негізгі жетістігі 130-дай ұлт пен ұлыс мекендейтін Қазақстанда тыныштық пен татулықты сақтауы, қантөгіске жол бермеуі дер едім. Міне, осындай «қой үстіне бозторғай жұмыртқалаған» заманды ары қарай жалғастыру үшін, еліміздің болашағы жарқын болуы үшін Ассамблеяның ұсынысын бірауыздан қолдауымыз керек!
Қазіргі уақытта әлемдік экономикалық дағдарыстың орын алып жатқанынан хабардармыз. Алайда Президент бұл дағдарыстың алдын алуда. Оған Елбасының «Нұрлы жол – болашаққа бастар жол» атты Жолдауы дәлел болмақ. Сонымен қатар 11 ақпан күні өткен Үкіметтің кеңейтілген отырысында сөйлеген сөзінде Мемлекет басшысы: «Қазақстанда экономикалық дағдарыс жоқ, тек қана сыртқы факторлардың әсері бар», — деп атап өткен болатын. Сондықтан әрбір қазақстандық мемлекеттің дағдарыстың алдын алуға бөлген қаржысын бақылауға алып, оны тиімді пайдалану керек.
Ресми деректерге сүйенсек, әлемдік экономикалық дағдарыстың шарықтау шегі 2016 жылға келеді деген болжам бар. Сондықтан Президент сайлауын 2015 жылы өткізу жөніндегі Қазақстан халқы Ассамблеясының ұсынысын толықтай қолдай отырып, барша халықты да бірауыздан қолдауға шақырамын.
Ержан ҚҰТТЫБАЕВ,
Облыстық мәслихаттың депутаты,
Тарбағатай ауданы.
