Қалалық мәслихаттың кезектен тыс отыз жетінші сессиясы өтті. Жиынға қала әкімі Айбек Кәрімов, дербес бөлім басшылары, қоғамдық ұйым өкілдері, Ардагерлер кеңесінің мүшелері қатысты. Сессия барысында жеті сұрақ талқыланды.
{jcomments on}Жиын басында қала әкімі Айбек Кәрімов қалалық жергілікті мемлекеттік және өзін-өзі басқарудағы қаланы дамытуға қосқан үлестері үшін бірнеше азаматқа ҚР Инвестициялар және даму министрі Әсет Исекешевтің Алғыс хаттарын табыстады.
Сессия барысында күн тәртібіне сегіз сұрақ ұсынылған болатын. Алайда қалалық мәслихат депутаттары Семей қаласы бойынша коммуналдық қалдықтарды жинақтау, шығару және көмуге тарифтерді бекіту туралы мәселені талқылауды кейінге шегеруді ұсынды. Осы ретте мәслихат депутаты Бауыржан Қайрамбаев арнайы комис-сияның мұндай шешімге келуін былай деп түсіндірді:
— Біріншіден, комиссия қарауына ұсынылған есептік құжаттар бойынша коммуналдық қалдықтарды жинақтау, шығару және көмуге қатысты көпқбатты тұрғын үйлерге арналған тариф тым жоғары болып тұр. Сонымен бірге жеке тұрғын үйдің қалдықтарын шығару бойынша қызмет ақысы бір адамға емес, жеке үйге есептеліп көрсетілген. Бұл қолданыстағы ережеге қайшы. Осы мәселеге қатысты ескертулер арнайы комиссия отырысында айтылған. Сондықтан комиссия мүшелері бұл сұрақты бүгінгі сессияның күн тәртібінен алып тастап, аталған мәселені алдағы сессиялардың бірінде қарауға ұсынуды ұйғарды.
Ұсыныс қалалық мәслихат депутаттары тарапынан қолдау тапты. Семей қаласы бойынша коммуналдық қалдықтарды жинақтау, шығару және көмуге тарифтерді бекіту туралы мәселе күн тәртібінен алынып тасталды. Осылайша, сессия-да жеті сұрақ қарастырылды.
Бірінші кезекте Семей қаласын басқару схемасы туралы мәселе бойынша қала әкімі аппарат жетекшісінің міндетін атқарушы Айдын Елтай баяндама жасады. Қазақстан Республикасының Президенті 2014 жылдың 25 тамыз күні қол қойған «Қазақстан Республикасының мемлекеттік басқару деңгейлері арасында өкілеттіліктердің аражігін ажырату жөніндегі шаралар туралы» жарлығына сәйкес, орталық атқарушы органдардан жергілікті атқарушы органдардың өкілеттілігіне әділет саласы бойынша берілген функциялар жөнінде айтып өтті. Баяндама тыңдалып болғаннан кейін, қала әкімі Айбек Кәрімов:
— Былтыр орталық атқарушы органдардан жергілікті атқарушы органдар өкілеттілігіне көптеген функциялар берілді. Бүгін, міне, азаматтық хал-ахуалды тіркеуге қатысты, ветеринария саласы бойынша өзгерістер туралы айтылды. Осыған орай, ұсыныстарымызды сессияның күн тәртібіне шығарып отырмыз, — деп, өзінің пікірін білдірді.
Депутаттар ұсынылған шешім жобасын бірауыздан қолдап дауыс берді. Сондай-ақ сессия барысында «Қаланың терроризмге қарсы комиссиясының дербес құрамы туралы» 2014 жылғы 6 қарашадағы шешімге өзгерістер енгізу, қала әкімдігі жанындағы құқық бұзушылық жөніндегі ведомствоаралық комиссияның дербес құрамы, Семей қаласының аз қамтылған отбасыларына тұрғын үй көмегінің мөлшерін белгілеудің және көрсету тәртібінің ережесін бекіту туралы мәселелер қаралды. Ауылдық жердегі жұмыс үшін лауазымдық жалақыларына арттыру белгіленген білім және мәдениет саласы мамандарының лауазымдарының тізбесін келісу, 2014 жылғы 15 наурыздағы «Семей қаласы мәслихатының жанындағы марапаттау комиссиясының Ережесі мен құрамы туралы» шешімге өзгерістер енгізу туралы, Сайлау комиссияларының жекелеген мүшелерін міндеттерінен босату туралы сұрақтар талқыланды. Мәселелер бойынша жан-жақты мәліметтер берілген баяндамалар тыңдалғаннан кейін, мәслихат депутаттары ұсыныл-ған шешімдер жобаларын бірауыздан қолдап дауыс берді.
Мирас ҚҰСАЙЫН,
«Семей таңы»
