Semeytany.kz — Абай облысында өңірдегі сәулет-құрылыс нысандарының сапасына арналған жиын өтіп, оған облыстық басқарма басшылары қатысты, қала және аудан әкімдері онлайн қосылды. Жиынды облыс әкімі Берік Уәли жүргізді.
Күн тәртібіндегі мәселе бойынша Абай облысының мемлекеттік сәулет-құрылыс бақылау басқармасының басшысы Сайлауғалы Байназаров баяндама жасады. Басқарманың мәліметінше, аймақ басшысының хаттамалық тапсырмасы және Ұлттық экономика министрінің бұйрығына сәйкес қалалар мен аудандардағы 142 нысанда құрылыс сапасына мониторинг жүргізілді. Бұл – облыс құрылғаннан бергі алғашқы кешенді тексеріс, оның нәтижесінде жұмыс кестесіне сәйкестік пен орындалу деңгейі ашық анықталды. Сонымен қатар 183 нысанға бірлескен тексеру ұйымдастырылды. Семей қаласының сәулеттік келбетін бұзып тұрған нысандарды ретке келтіру бағытында да бақылау жүргізілді.
Мониторинг қорытындысы бойынша кемшіліктері бар аудандардың әкімдері мен салаға жауапты орынбасарлары анықталған олқылықтарды жою жоспарын ұсынды. Облыс әкімі құрылыс сапасы мен қауіпсіздігіне, заң талаптарының сақталуына баса назар аударып, салаға жауапты орынбасары Серік Төленбергеновке барлық жұмысты қатаң бақылауда ұстауды тапсырды.
«Бұл мәселе бойынша біз бірнеше рет арнайы жиналыс өткізіп, тапсырма бергенбіз, алайда уақтылы орындалмаған. Кез келген құрылыс нысаны заң талаптарына сай, халық үшін қауіпсіз болуы тиіс. Қаржы бөлінгеннен кейін баршамыз жауаптымыз. Аталған нысандардың құрылысы менің тікелей бақылауымда болады», – деді Берік Уәли.
Қорытындысында облыс әкімі анықталған бұзушылықтарды жоюдың нақты мерзімін белгілеуді, бақылау тетігін күшейтуді және Семей қаласының сырт келбетін жақсарту бойынша жеке жоспар әзірлеуді тапсырды.
