Semeytany.kz — Семей қаласындағы №51 «Келешек» мектебінде оқушылар пластик бөтелке қақпақтарын жинап, оларды қайта өңдеу арқылы мектеп дәлізіне арналған EcoBox атты экологиялық қоқыс жәшігін құрастырды.
Жоба мектептің STEM бағыты аясында оқушылардың экологиялық мәдениетін арттыру мақсатында ұйымдастырылған. 6–7 сынып оқушылары мұғалімдерінің жетекшілігімен пластиктің қасиеттерін зерттеп, жәшіктің макетін жасап, қақпақтарды біріктірудің түрлі тәсілдерін тәжірибе жүзінде сынап көрді.
Жұмыс барысында балалар EcoBox-тың өлшемдері мен пішіндік пропорцияларын есептеп, ғылым, технология, инженерия және математика бағыттарының негізгі элементтерін қолданды. Осы арқылы олар тек қолөнермен шектелмей, нақты есептеулер мен техникалық ойлауды да дамытуға мүмкіндік алды.
Оқушыларға мұндай идея республикалық «Таза Қазақстан» акциясы аясында келген. Балалар өз айналасында жиналып қалған пластик қалдықтарының көптігін байқап, оларды далаға тастамай, жаңа бұйымға айналдыруды жөн көрген. Оқушылардың айтуынша, «әр жиналған қақпақ – таза елге қосылған бір кішкентай қадам».
EcoBox дайындау үшін шамамен 2100 пластик қақпақ пайдаланылған. Дайын жәшік мектеп дәлізінде орнатылып, оқушылар мен мұғалімдерге пластик қалдықтарды бөлек жинап, сұрыптауға мүмкіндік беріп отыр. Мектеп әкімшілігінің айтуынша, жоба оқушылардың жауапкершілігін арттырып, экосананы қалыптастыруға оң ықпал етуде.
Алдағы уақытта мектеп ұжымы пластик қақпақтардан EcoBench (экоорындық) жасау, мектеп ауласын экологиялық материалдармен абаттандыру, сондай-ақ «STEM EcoLab» бұрышын ашып, тәжірибелік экожобаларды көбейтуді жоспарлап отыр.
