Қазіргі таңда ата-ананың қамқорлығынсыз қалған балалардың аз емес екендігі белгілі. Алайда елімізде мейірімді жандардың да көптеп кездесетіні — қуантарлық жағдай. Олай дейтініміз ондай жандар өзгенің де баласын бауырына басып, ата-аналық мейірімін төгіп, сәбилерді бағып-қағып өсіруде.
{jcomments on}Сондай ата-ананың бірі — көкпектілік Ғалия Құсманова. Ол отыз жылдан астам өмірін бала тәрбиесіне арнаған. Өз балалары жоғары білім алып, өсіп-жетіліп, жеке кеткендіктен, ол ата-ана қамқорлығынсыз қалған орыс ұлтының баласы Гена Костарев деген баланы асырап алған. Отбасында жылы қарым-қатынас жасап, оған ана жылуын сезінуге көмектесуде. Ғалия Сағдоллақызының бала тәрбиелеудегі тәжірбиесі де, білімі де жеткілікті. Басында қонақ ретінде бірнеше ай үйінде тұрған Гена енді екі жылдан бері сол үйде тәрбиеленуде.
— Генаны алған кезде, өз ата-анасынан көрген тәрбиесінің қандай екені ол баладан көрініп тұрды. «Адал бол, ұрлықтан аулақ бол, жамандық жасама, жақсылық жасауға тырыс»,- деп үнемі айтып отырамын. Ол бала қазір көп өзгерді, орыс ұлтының өкілі болса да, Гена қазақ тілінде жақсы сөйлейтін болды. Жеңіл тамақты да пісіруді, бау-бақшаны қалай күтіп баптауды, одан алған өнімді қысқа дайындауды көріп үйренді. Нан бағасының қанша тұратынын білмейтін, қазір дүкенге барып келеді. Телефонға, тіпті су мен газға да ақша төлеу керектігін білді. Гена футбол үйірмесіне қатысады. Жазғы каникулда көршілердің балаларымен ойнап, суға түсіп, жидек теруге барып, уақытын қызықты өткізді, — дейді Ғ.Құсманова.
Үйдегі тәрбиенің өмірде керек болатыны түсінікті. Балалар үйінде де барлық жағдай жасалған. Бірақ қандай адам болмасын топ-топ болып өмір сүруді қаламайтыны белгілі. Балалардың қайсысы болмасын үйде тәрбиеленуді армандайды. Ал патронат тәрбиеші қамқорлығына алған баламен бірге отырып сабақ қарайды, киімін жуып, тамағын пісіріп, киім-кешекпен қамтамасыз етіп, үйде де, түзде де баланың жүріп — тұрғанын бақылайды. Патронаттық тәрбие жетімдіктің алдын алуға және баланың үлкендермен, айналасындағы адамдармен тұрақты түрде қарым-қатынас жасап отыруына жағдай жасайды және баланы болашақ өмір жолына дайындайды.
Гүлбаран АҚШАБАЕВА,
«Нұр Отан» партиясы аудандық филиалы төрағасының орынбасары,
Көкпекті ауданы.
