Спорт әлеміндегі жағымды жаңалықтар күн санап толығу үстінде. Айбынымызды асқақтатар ұландар халықаралық додадаларда бақ сынап, ел абыройын, аудан намысын биік етуде алдарына жан салмай келеді. Осындай ұландарымыздың бірі жас спортшы, былғары қолғап шебері Дарын Берікжанов Ресейдің Владимир қаласында өткен бокстан халықаралық турнирде жүлделі ІІІ орынға табан тіреді.
{jcomments on}Байрақты бәсекеде 12 мемлекеттен барлығы 200 спортшы қатысып, жұдырық түйістіріп, ерекше шеберліктерін танытты. Спорттық сайыста олимпиада чемпионы, кәсіпқой бокстан әлем чемпионы Александр Паветкин жас спортшыларға сәттілік тілеп, өсіп келе жатқан боксшыларға салауатты өмір салтын ұстанудың, дене шынықтырумен айналысудың артықшылықтары мен спорттың адам өміріндегі алатын орнына, мән-маңызына тоқталды.
Дарынның осындай жетістіктерге жетуіне, әрине, спорттағы бапкері Жанболат Ұланның еңбегі зор деп білеміз. Дарынға алдағы уақытта да қажымай-талмай еңбектеніп, ауданның намысын қорғап, биіктерден көріне бер деген тілек білдіреміз.
*****
Қызылорда облысының Шиелі ауданында қазақ күресінен 1996 -1997 жылдары туылған жастар арасында Қазақстан Республикасының чемпионаты болып өтті. Жиыны 15 түрлі салмақ дәрежесі бойынша өткен жарысқа еліміздің барлық аймағынан 400-ге жуық балуандар қатысып, өзара мықтыларын анықтады.
Абай ауданының намысын үкілеп шыққан қазақ күресінің палуандары 82 келі салмақта Қуандық Құсайынов бақ сынап, ІІ орынды қанжығасына байласа, 60 келі салмақта боз кілемде белдесіп, жеңіске деген жігерін танытқан Сұңғат Құмаров ІV орынды иеленді. Дүбірлі бәсекеде І, ІІ орындарды иеленген спортшыларға «ҚР-ның спорт шебері» атағы беріліп, бұл — жас спортшылардың жігерлерін жанып, жеңіске деген ұмтылыстарын ұштады. Жеңімпаз және жүлдегер спортшылар ҚР Мәдениет және спорт министрлігінің дипломымен, кубокпен және медальдарымен марапатталды.
Балуандардың осындай биіктен көрінуі үшін, спортшыларын шыңдаған жаттықтырушы Нұғыманов Айбек Құралбекұлының еңбегін атап өткен жөн. Алдағы уақытта да жас спортшыларды жеңістің төрінен тамашалайтын боламыз деген сенімдеміз.
*****
Таяуда Петропавл қаласында 1997-1998 жылғы жасөспірімдер арасында дзюдо, самбо күресінен Қазақстан Республикасының чемпионаты болып өтті. Аталмыш чемпионатқа еліміздің түкпір-түкпірінен спортшылар келіп қатысты.
Байрақты бәсекеде Абай ауданының намысын қорғап, биіктерден көрініп жүрген жас спортшылар да бақтарын сынап, жүлделі орындарды еншілеп қайтқан болатын. Атап айтар болсақ, 73 келі салмақта Руслан Жарқынбаев самбо күресінен ІІ орынды иеленсе, 64 келі салмақта дзюдо күресінен Барыс Қуан ІІІ орын алып, аудан намысын айбарлы етті. Келешекте де спортшыларға толайым табыстар тілейміз. Ал спортқа деген жоғары пайым- пікірлерінің арқасында жанды қолдаулары мен оқу жаттығу жиынына демеушілік жасаған Айдос Қасенбаев, Думан Нариманұлы, Нұрбол Елеубеков, Қуаныш Оразбердин, Қуаныш Аринов, Мақсат Жарылғапов, Серікбол Сыздықов, Қайрат Ақылдасов, Шалқар Есенбаев, Нұрлан Алтыбаев, Нұрлан Балтақаев, Асқар Қайсақанұлы, Саят Жұмағұлов, Бақытбек Акишбаев сынды азаматтарға алғыс білдіреміз.
Абай аудандық ішкі саясат бөлімі.
