Патриотизм мен қазақстандық сәйкестікті дамытуға ықпал ету, зерттеу жұмысына деген қызығушылықты және заманауи технология негізінде шығармашылықты қалыптастыру мақсатында А.С.Пушкин атындағы облыстық кітапхана «Отаным менің — туған жер» деген тақырыпта кең мазмұнды жоба ұйымдастырған болатын.
{jcomments on}Кітапханалар жұмысы бір-бірімен тығыз байланыста болғандықтан, Қайнар орталықтандырыл-ған кітапхана ұжымы да бұл шараға атсалысып, Абыралы өңірінен жастарды, студенттерді, жоғары сынып оқушыларын, мәдениет қызметкерлерін осы жобаға қатыстыруға ұйытқы болды. Олар жоба міндеттерін түсіндіріп, берілген тақырыпқа сәйкес зерттеу жұмыстарын жазуға ықпал етті.
Бегалин атындағы жалпы орта білім беретін мектептің түлегі, студент Айбар Бакенов «Таңбалы тас» атты ғылыми зерттеу жұмысын жоба талабына сай орындап, конкурсқа жіберді. Ал ауылдың күміс көмей, жезтаңдай әншісі, мәдениет қызметкері Бағзада Жұмабекова бұл жобаға өнердің киелі шаңырағы болған «Қайнар» халық театрының өзіндік тарихына үңіліп, зерттеу жазбасын жолдаған еді. Сондай-ақ мектептің 11 сынып оқушысы Азамат Әлмұратов та «Отаным менің — туған жер» атты жобаға қатысты. Олар жуырда жоба аясында өздерінің шығармашылық ізденістерімен танылып, жетістікке ие болды. Облыстық кітапхананың дипломымен, сыйлықтарымен марапатталды.
Оқушыларын ғылыми жобада тақырып бойынша зерттеу жүргізуге, жобамен жұмыс істеу ерекшеліктерін меңгертуге ерекше көңіл бөліп, осы жобаға да қатысуға жетекшілік жасаған Бегалин атындағы орта мектептің ұстаздары Б.Ташимов пен М.Қуатбаева облыстық кітапхана директорының арнайы дипломы мен сертификатын иеленді. Осы жоба және марапаттар оларды жаңа зерттеу жұмыстарын жүргізуге ынталандырып, қызығушылықтарын арттыруда десе де болады.
Қазима ҚАЖЫБЕКОВА,
«Семей таңы»
