8 Наурыз – Халықаралық әйелдер күні қарсаңында, яғни сәрсенбі күні, Семей қалалық орталық кітапханасында «Жанұя орталығы» қоғамдық қоры мен мәдениет және демалыс саябағы ұжымының ұйымдастыруымен тыл ардагерлерін, ақ жаулықты әжелерді салтанатты түрде құттықтау рәсімі өтті. Шараға ардагерлермен бірге, студент жастар да қатысты.
{jcomments on}- Шараның мақсаты — тылда тер төккен еңбек адамдарының патриоттық ерліктерін насихаттау, үлгі-өнегесі мен тәлім-тағылымын студент жастардың бойына сіңіру, аналар мен аруларды мерекелерімен құттықтап, ана еңбегін қа-дірлей білуге жас ұрпақты тәрбиелеу,- дейді «Жанұя орталығы» қоғамдық қорының психологы Н.Қуандықова.
Ардагерлер мен студенттердің кездесуінде ерлік, елдік ісі сөз болды. Тылда еңбек еткен аналар өткен өмір белестері жайлы естеліктерімен бөлісті. Сарбаздарға арналған өлең шумақтарымен сөзін бастаған тыл ардагері Нина Владимировна:
— Бейбіт өмір ұрпақтары соғыс жайлы ойлағанымен, сол кездегі қиыншылықты сезіне алмасы анық. Соғыс ардагерлерімен тыл еңбеккерлерін салыстырып, «соғыс ардагерлері майданда ерлік көрсетті, тылдағылар не істепті?» деген сауал да жас ұрпақтың санасына оралуы мүмкін. Бірақ біз де соғыстың лебін сездік. Балалық шағымыз балдай тәтті бақытқа толы болды деп айта алмаймын,- дей келе, мектепте оқып жүрген кездерінде, сабақтан соң емханаларда әр оқушы майданнан жаралы оралған үш жауынгерге күтім жасағанын, қан мен оқты көріп, жүрек жарасымен бетпе-бет келгендіктерін айтты. Тылда майдан даласына азық пен киім-кешек жөнелтуге атсалысқандықтарын сөз етті. Сұрапыл жылдары қаламызда фабрика, зауыттар көптеп ашылып, ер- азаматтардың ел қорғауға аттануына байланысты ауыртпашылық аналар мен жеткіншектерге түскенін, тағдыр ешкімді де еркелетіп, маңдайынан сипамағанын жеткізді.
Қай заманда да еңбек жетістікке жетелейтінін айтқан ардагерлер жастарды еңбекті сүюге, үлкенге ізет, кішіге құрмет көрсетуге шақырды. «Біздің балалық пен бойжеткен шағымыздағы қиыншылықтарды ұрпақтарымыз сезген жоқ, ондайды көрмесе де екен дейміз. Кейінгі жастар тек бақытты аспан астында баянды ғұмыр кешсін» деген тілектерін білдіріп, өздеріне құрмет көрсетіліп отырғаны үшін, шараны ұйымдастырушыларға аналық алғыстарын айтты.
Шара барысында «Жанұя орталығы» қоғамдық қорының директоры міндетін атқарушы Людмила Асташкина:
— Бақытты ғұмыр кешуімізге сіздердің сол кездегі еңбектеріңіз мол септігін тигізді. Жеңісті жақындатуға қосқан үлестеріңіз ұшан-теңіз. Біздің жүрегіміздегі сіздерге деген құрмет те өлшеусіз. Ауырмаңыздар, сыр-қамаңыздар. Үнемі ерлік пен елдіктің, адал еңбектің ерен үлгісін насихаттап, ортамызда жүре беріңіздер,- деп, жылы лебізін білдірді.
Семей қалалық мәдениет және демалыс саябағының ұжымы әннен шашу шашып, кездесу көрігін қыздырды. «Анашым» әнін барлық тыл ардагерлері қосыла шырқап, жиналған қауымды тебіреніске бөледі. Өз кезектерінде студенттер де жүректерінен шыққан өлең жолдарын жолдап, ардагер әжелеріне ыстық ықыластарын білдірді. Жастар үшін шараның берері мол екендігін тілге тиек етті. Кездесу соңында ұйымдастырушылар құрметті жандарға ескерткіш сыйлықтар мен гүл шоқтарын арнап, мерекелік көңіл күй сыйлады.
Әйгерім СӘРСЕНҒАЛИ,
«Семей таңы»
