Semeytany.kz — Тәуелсіздік күні қарсаңында Абай облысының Ақсуат ауданында бірқатар медициналық нысан пайдалануға берілді. Атап айтқанда, Үштөбе мен Екпін ауылдарында дәрігерлік амбулаториялар ашылса, Кіндікті ауылында фельдшерлік-акушерлік пункт есігін айқара ашты. Ал Қызылжұлдыз, Көктүбек, Сұлутал және Айнабастау елді мекендерінде жаңа медициналық пункттер салтанатты түрде іске қосылды.
Жаңа нысандар «Ауылдық денсаулық сақтауды жаңғырту» ұлттық жобасы аясында салынған. Медициналық мекемелер заманауи талаптарға сай жабдықталып, тұрғындарға диагностика жасауға, ем жүргізуге және алдын алу шараларын ұйымдастыруға қажетті құралдармен толық қамтылған.
Дәрігерлік амбулаторияларда компьютерлік техника, дефибриллятор, ультрадыбыстық және физиотерапиялық аппараттар, инфузиялық құрылғылар, небулайзер, пульсоксиметр сияқты құрылғылар орнатылған. Сонымен бірге зертханалық және гинекологиялық жабдықтар да қарастырылған.
Нысандардың ашылу рәсіміне аудан басшылығы, медицина қызметкерлері және ауыл тұрғындары қатысты. Жергілікті жұртшылық бұл бастаманың алғашқы медициналық көмекті қолжетімді етіп, ауылдағы денсаулық сақтау сапасын арттыруға сеп болатынын айтып отыр.
