Semeytany.kz — Абай облысының әкімі Берік Уәли Семей қаласын аралау барысында аутизм спектрі бұзылған балаларға арналған оңалту орталығына барып, мекеменің қазіргі жұмысына қанықты.
Орталық 2023 жылдың желтоқсан айында облыс әкімдігінің қолдауымен ашылған. Мекеме Болат Өтемұратов қорының қолдауымен жұмысын бастап, Қазақстандағы 13-ші аутизм орталығы саналады. Оңалту орны 100 орынға есептелген, мұнда 30 маман еңбек етеді. Ғимаратта жеті мамандандырылған кабинет, акт залы және мәжіліс залы қарастырылған.
Қазіргі таңда орталықта 0 жастан 18 жасқа дейінгі 77 бала және олардың ата-аналары (заңды өкілдері) қызмет алуда. Жыл сайын мекеме аутизм спектрі бұзылыстары бар 300-ге жуық баланы қамтиды. Орталық ашылғалы бері 600-ден астам бала мен олардың отбасыларына тегін көмек көрсетілген.
Сабақтар «Аутизм. Баршамызға бір әлем» бағдарламасының стандарттарына сай алты интервенциялық бағыт бойынша жүргізіледі. Әрбір балаға арналған жұмыс циклі үш айға есептеліп, диагностикалық қорытынды негізінде жеке бағдарлама арқылы реттеледі. Негізгі мақсат – аутизм спектрі бар балалардың өмір сапасын жақсартуға бағытталған қолдау жүйесін дамыту және енгізу.
Аймақ басшысына орталықтың қызмет бағыттары мен ұсынылатын қолдау түрлері таныстырылып, облыс әкімі ғимаратты аралап, қызметкерлермен пікірлесті. Кездесу барысында Берік Уәли ұжымның еңбегіне алғыс білдіріп, бұл бағыттағы жұмыстарға өңір тарапынан қолдау жалғасатынын айтты.
