Мемлекет басшысының «Нұрлы жол – болашаққа бастар жол» атты Жолдауы аясында кеше «Қазақстан Ипотекалық компаниясы» ИҰ» АҚ желісі бойынша өңірлерді дамытудың 2020 жылға дейінгі бағдарламасымен салынған Шугаев көшесі, 159 мекенжайындағы тұрғын үй пайдалануға беріліп, пәтер кезегінде тұрған бірқатар семейлік отбасылар қоныс тойын тойлады. Қоныстанушыларға пәтер кілттерін қала әкімі Айбек Кәрімов салтанатты түрде табыс етті.
{jcomments on}Салтанатты шара барысында ал-ғашқы болып сөз алған қала әкімі Айбек Кәрімов:
— Елбасы барлық деңгейдегі әкімдерге ең алдымен қарапайым халықтың жағдайын жасау керектігін тапсырған болатын. Бұл тұрғыда, Мемлекет басшысының тапсырмасына орай, елімізде, қаламызда жүйелі түрде жұмыстар жүргізілуде. Бүгін, міне, «Нұрлы жол – болашаққа бастар жол» Жолдауы аясында тұрғын үй пайдалануға беріліп, пәтерге ие болдыңыздар. Қоныстарыңыз құтты болсын. Шаңырақтарыңыз әрдайым тек шаттыққа кенелсін, — деген тілегін білдірді.
Жолдау аясында «Қазақстан ипотекалық компаниясы» ИҰ» АҚ тұрғын үйлерді ШҚО бойынша алдымен Семей қаласында бере бастағанын атап өткен қала басшысы компания басшылығына ризашылығын айтты.
— Қаланың бірқатар аудандарында зәулім тұрғын үйлер салынуда. Ал сіздер қоныстанып жатқан тұрғын үйге жақын жерде Назарбаев зияткерлік мектебінің ғимараты және СММУ – нің 8 — жатақханасының, сондай-ақ үлкен сауда орталығы салынып жатқанынан хабардар боларсыздар. Сонымен қатар ол жерде әлемдік стандартқа сай заманауи технологиялармен жабдықталатын екі үлкен дәрігерлік орталық, бірқатар көпқабатты тұрғын үйлер мен балабақша салынады. Сондықтан бұл аудан болашақта қаланың ең көрікті жерлерінің бірі болады, — деген Айбек Мүталапханұлы сөз соңында жұртшылықты келе жатқан Наурыз мерекесімен құттықтады.
Өз кезегінде сөз алған «Гордорстрой» ЖШС-нің директоры, «Семмелио-рация» заңдылық тұлғалар бірлестігінің құрылтайшысы Бауыржан Қайрамбаев пен «Қазақстан ипотекалық компаниясы» ИҰ» АҚ-ның басқарушы директоры Еркін Сыздықов та қоныстанушыларды құттықтап, ізгі тілектерін жеткізді.
Салтанатты шара барысында жаңа пәтерге қоныстанушылардың атынан сөз алған Шарбат Сәрсенбина мен Әмина Өзбекова Елбасының атына және қала басшылығына өздерінің шексіз алғыстарын айтты.
120 пәтерлі көпқабатты тұрғын үйге әзірге 40 отбасы қоныстанды. Қала әкімінің орынбасары Асхат Хосчановтың айтуынша, мұндағы 1 және 2 бөлмелі пәтерлер 20 жылға жалға беріледі де, 20 жылдан кейін жекешелендіріледі екен. Ал 1 шаршы метрдің жалға алу төлемі 700 теңгені құрайтын көрінеді.
— Былтыр тұрғындарға 200 пәтер берілді. Биыл, міне, бұл тұрғын үйдегі 120 пәтерден бөлек жылдың аяғына дейін тағы да 140 пәтер берілетін болады. Қазіргі уақытта «Қазақстан ипотекалық компаниясы» ИҰ» АҚ-ның бағдарламасы бойынша тағы да 2 тұрғын үй салынуда. Алдағы сәуір айында тағы 4 тұрғын үйдің құрылысы басталады деп жоспарлануда. Жалпы, жылдың аяғына дейін 300-350 пәтерді ел игілігіне беруді жоспарлап отырмыз. Қазіргі таңда 6 мыңнан астам отбасы пәтер кезегінде тұр, — дейді Асхат Хосчанов.
Қала әкімі Айбек Кәрімов бастаған топ пайдалануға берілген пәтерлерді аралады. Пәтерлерге талапқа сай жөндеу жұмыстары жүргізілген екен. Пәтер кілтіне ие болғандардың бірі Бауыржан мен Әмина Өзбековтер — екі бала тәрбиелеп отырған өнегелі отбасы. Қала басшысы бастаған мәртебелі меймандарды қуанышпен қарсы алған Серікбол Өзбеков баспаналы болғаны үшін өз ризашылығын жеткізді.
Нұрдәулет КӘКІШЕВ,
«Семей таңы»
