Semeytany.kz – Абай облысының әкімі Берік Уәли Семей қаласындағы теміржол вокзалы ғимаратын қайта құру жұмыстарының барысын қарап, мердігер ұйым өкілдерінен жөндеу кезеңдері мен жобаның негізгі бағыттары туралы ақпарат алды.
Жаңғырту жұмыстары Мемлекет басшысының тапсырмасына сәйкес жүргізілуде. Қазіргі уақытта «Қазақстан темір жолы» ұлттық компаниясының қаражаты есебінен өңірдегі 10 теміржол вокзалы кезең-кезеңімен жаңартылып жатыр.
Семейдегі теміржол вокзалы 1915 жылы салынған. Ғимараттың жалпы ауданы 3037,9 шаршы метр. Бұл нысанда соңғы рет 1972 жылы қайта құру жұмыстары жасалып, 2013 жылы күрделі жөндеу жүргізілген.
Қазіргі жөндеу аясында вокзалдың сыртқы келбеті заманауи еуро панельдермен қапталып, аумағы кеңейтілуде. Бүгінде демонтаждау және шатыр жабу жұмыстары орындалып, инженерлік желілерді жаңарту жалғасып жатыр. Жаңғырту жұмыстарын толық аяқтау 2026 жылдың IV тоқсанына жоспарланған.
Аймақ басшысы жұмыс сапасын қатаң бақылауда ұстап, белгіленген кестеден кешікпей орындауды тапсырды. Сонымен қатар, жолаушыларға барынша қолайлы жағдай жасау қажеттігін атап өтті. Жөндеу кезеңінде жолаушыларға қызмет көрсету үшін вокзалдың оң жағында жалпы ауданы 85 шаршы метр болатын уақытша қызмет көрсету орындары ұйымдастырылған.
