Кеше ШҚО әкімі Даниал Ахметов жұмыс сапарымен Семейге келіп, шаһарға өткен жолы жасаған іссапарындағы тапсырмалары бойынша атқарылып жатқан жұмыстармен танысты.
{jcomments on}Естеріңізге салар болсақ, өңір басшысы 5 наурыз күнгі сапарында онкологиялық диспансердің радиологиялық орталығының құрылыс жұмысына арналған жиын өткізіп, құрылыс жұмыстарының кешеуілдеуіне байланысты мердігерлерді қатаң сынға алып, бас мердігер «ИртышГэсСтрой» ЖШС-нің бас директоры А.Изотовтың тарапынан жұмысты аяқтау үшін тиісті шаралардың атқарылмағанын, бұған қоса өңір басшысы мұның абырой әкелмейтінін айтып, бірқатар тапсырмалар жүктеген болатын. Бұл жолғы сапарында да аймақ басшысы осы мәселе бойынша денсаулық сақтау саласының жетекшілерімен және мердігерлермен тағы да жүздесті.
Жиынға Семей қаласының әкімі Айбек Кәрімов пен ШҚО әкімінің орынбасары Жақсылық Омар, ШҚО құрылыс, сәулет және қала құрылысы басқармасының басшысы Юрий Шматко, ШҚО денсаулық сақтау басқармасының басшысы Вадим Овсянников және Семей өңірлік онкологиялық диспансерінің директоры Марат Сандыбаев, «Медтехника» АҚ-ның бас директоры Наталья Шрамченко мен «ИртышГэсСтрой» ЖШС-нің бас директоры Александр Изотов қатысты.
Облыс әкімінің тапсырмасына сәйкес, бұл мәселе бойынша сараптамалық топ жасақталып, сын-ескертпелерге байланысты арнайы кесте құрылған. Жиын барысында мердігерлер мен жауапты мамандардан 15 күн ішінде атқарылған істер жайлы сұраған Даниал Ахметов аталмыш мәселе бойынша межеленген жұмыстарды атқаруға нақты уақыт берді.
Құрал-жабдық тасымалдаушылар да жабдықты құрастыру жұмыстарын аяқтауды кешеуілдетуде. «Медтехника» АҚ-ның бас директоры Наталья Шрамченконың сөзіне сүйенсек, бұл жұмысты тезірек атқару үшін құрастыратын орын қажет көрінеді. Бұл тұрғыда қаржыландырудың да аса маңызды рөл атқаратынын айтады Н.Шрамченко.
— Техникалық құжаттаманың тапсырысы бойынша бір апта уақыт беремін. Бұл жұмысты жөнге келтіріңіздер. Ал ПЭТ — 64 мәселесі бойынша ұсыныстарыңыз бен пікірлеріңізді енгізуді тапсырамын. 24 наурыз күні «ИртышГэсСтрой» ЖШС Хорватиядан тасымалданатын құрылғыларға қатысты жұмысты толық аяқтауға тиіс, — деп тапсырған Даниал Ахметов барлық ұйымдардың мәселені бірлесіп шешуге, жұмылып жұмыс жасауға шақырды.
Айта кету керек, радиологиялық орталықтың құрылысы 2012 жылы басталып, 2014 жылы аяқтау көзделген болатын.
Бұл жерден кейін облыс әкімі Даниал Ахметов пен қала әкімі Айбек Кәрімов бастаған топ алдағы уақытта құрылыс жұмыстары жүргізілетін бірқатар нысандардың орнын аралап өтті.
Нұрдәулет КӘКІШЕВ,
«Семей таңы»
