Semeytany.kz — Облыс әкімі Берік Уәли Семей қаласындағы Геодезия, картография және құрылыс жоғары колледжіне барып, оқу орнының жұмысымен танысты. Сапар барысында аймақ басшысы оқытушылармен және студенттермен пікірлесіп, жастардың практикалық жұмыстары мен жобаларын көрді.
Колледжде заманауи білім беру тәсілдері кең қолданылып келеді. Компьютерлік техникамен жабдықталған информатика кабинеттері, STEM-зертхана, колледж студиясы студенттердің шығармашылық әлеуетін ашып, тәжірибелік дағдысын шыңдауға мүмкіндік береді. Оқу кабинеттері де кәсіби даярлыққа қажетті талаптарға сай жасақталған.
1968 жылы пайдалануға берілген бұл оқу орны өңірдегі техникалық және кәсіптік білім беру саласында маман даярлайтын іргелі мекемелердің бірі саналады. Қазіргі таңда мұнда 1400 студент білім алса, соның 300-і жұмысшы мамандықтары бағыты бойынша оқып жүр.
Колледж студенттері халықаралық деңгейдегі кәсіби жарыстарда бақ сынап келеді: 2024 жылы Францияның Лион қаласында өткен WorldSkills Lyon чемпионатына қатысса, 2025 жылы Данияның Хернинг қаласындағы EuroSkills Herning додасында өңір намысын қорғады. Сондай-ақ кәсіпкерлер палатасының бастамасымен өткен өңірлік байқауда оқу орны «жұмысшы кадрларды даярлайтын үздік колледж» атағын иеленген.
Оқу орны академиялық ұтқырлықты дамыту мақсатында Германияның бірқатар өндірістік компанияларымен меморандумдарға қол қойған. 2024–2025 оқу жылында Қазақстан бойынша 22 келісім мен меморандум жасалып, сондай-ақ Тәжікстан Республикасының Душанбе қаласындағы инженерлік-педагогикалық колледжімен 2 халықаралық меморандум бекітілген. Колледждегі құзыреттілік орталығы халықаралық стандарттарға сай мамандар даярлауға, WorldSkills бағытындағы қатысушыларды дайындауға және жұмысшы мамандықтарын кеңінен насихаттауға жұмыс істеп отыр.
Сапар соңында облыс әкімі техникалық және кәсіптік білім беру жүйесінің өңір үшін маңызын атап өтіп, бұл бағыттағы жұмыстарға қолдау көрсету жалғасатынын жеткізді.
