Semeytany.kz — Абай облысының әкімі Берік Уәли Үржар ауданына жұмыс сапары барысында Ер-Қабанбай ауылындағы әлеуметтік маңызы бар бірқатар нысандардың жұмысымен танысты.
Алдымен аймақ басшысы ауылда бой көтерген медициналық пункттің ашылу рәсіміне қатысты. Нысан «Ауылдық денсаулық сақтауды жаңғырту» ұлттық жобасы аясында салынған. Медициналық пункт заманауи құрал-жабдықтармен толық қамтылып, ішінде терапевт, акушер және ем-шара кабинеттері қарастырылған. Мекеме тәулігіне 15 адамға дейін қабылдай алады.
Облыс әкімі ауыл тұрғындары үшін мұндай нысанның маңызы ерекше екенін атап өтіп, Мемлекет басшысының қолдауымен өңірде соңғы екі жылда 65 медициналық нысан пайдалануға берілгенін айтты. Оның жетеуі Үржар ауданында іске қосылған.
Сапар барысында Ер-Қабанбай ауылындағы ауыз су мәселесінің де шешімін тапқаны айтылды. Мұнда су құбыры желілері мен су жинау ғимаратының құрылысы жүргізіліп, жоба былтыр басталып, биыл толық аяқталған. Нәтижесінде жалпы ұзындығы 9,122 шақырым болатын су құбыры желілері тартылды. Су көзі ретінде тереңдігі 70 метр ұңғыма іске қосылып, сорғы жабдығы 20 метр тереңдікке орнатылған. Жоба бойынша 84 құдық пен 21 өрт гидранты қарастырылған.
Жаңадан салынған су желісі арқылы 129 абонент сапалы ауыз сумен қамтылып, жалпы 533 тұрғынға қызмет көрсетіледі. Жоба ауылдың 5 көшесін толық қамтиды. Айта кетерлігі, Ер-Қабанбай ауылында бұған дейін таза ауыз су жүйесі болмаған.
