Semeytany.kz — Бүгін Семей қаласындағы «Арена» мәдени-спорт кешенінде «Ғажайыпқа толы Жаңа жыл!» атты облыс әкімінің дәстүрлі шыршасы өтті. Мерекелік кешке өңірдің қала-аудандарынан іріктелген 150 оқушы қатысты.
Шараға 9-13 жас аралығындағы жетім және ата-анасының қамқорлығынсыз қалған балалар, аз қамтылған әрі көпбалалы отбасылардың оқушылары, ерекше білім беру қажеттіліктері бар жеткіншектер, сондай-ақ оқу, спорт, шығармашылық және қоғамдық жұмыстарда жоғары нәтижеге жеткен үлгілі оқушылар шақырылды. Сонымен бірге арнайы интернаттар мен мекемелерден келген балалар да мерекелік басқосуда бас қосты.
Облыс әкімі Берік Уәли балаларды Жаңа жыл мерекесімен құттықтап, өңірдің қасиетті тарихын атап өтіп, оқуда озат болуға үндеді. Аймақ басшысы бұл жолғы шырша мерекесі облыстағы ең еңселі нысандардың бірі саналатын «Аренада» ұйымдастырылып, балаларға ерекше көңіл-күй сыйлауды мақсат еткенін айтты.
Бағдарлама барысында театрландырылған қойылым көрсетіліп, аниматорлар мен балалар шығармашылық ұжымдары өнер көрсетті. Аяз Ата мен Ақшақардың қатысуымен ойындар, байқаулар ұйымдастырылып, мерекелік концерт өтті.
Кеш соңында шыршаға қатысқан әр балаға облыс әкімінің атынан 100 мың теңгелік сертификат табысталып, тәттілер мен ойыншықтар салынған жаңа жылдық себет сыйға берілді.
