Semeytany.kz — Үржар ауданына қарасты Шолпан ауылдық округінде республикалық «Ауыл құтқарушылары» бағдарламасы аясында салынған өрт сөндіру бекетінің ашылу салтанаты өтті.
Жаңа нысан ауыл тұрғындарының қауіпсіздігін күшейту мақсатында бой көтерген. Қазіргі таңда елді мекенде 1200-ден астам адам тұрады, 264 аула бар. Бекет барлық талаптар мен стандарттарға сай салынғаны айтылды.
Өрт сөндіру бекеті бір арнайы өрт сөндіру көлігімен жабдықталған. Мұнда екі өрт сөндіруші тұрақты негізде қызмет атқарып, төтенше жағдай туындаған жағдайда оқиға орнына жедел жетіп, әрекет етуге мүмкіндік алады.
Жаңа бекет өрттің алдын алу жұмыстарын жүйелеуге, оқыс жағдай кезінде уақытылы көмек көрсетуге жол ашып отыр. Бұл өз кезегінде ауылдағы қауіп-қатерді азайтып, тұрғындардың тыныштығын қамтамасыз етуге бағытталған маңызды инфрақұрылымдық қадам ретінде бағалануда.
Айта кетейік, өрт сөндіру бекеті ауыл жанашырының жеке қаражаты есебінен салынған.
