Semeytany.kz – Бүгін Абай облысының әкімі Берік Уәли жерлес ғалымдар – әдебиеттанушы, абайтанушы Серікқазы Қорабай және тарихшы-энциклопедист Серікбек Арғынғазинмен кездесті.
Кездесуде өңірдің тарихы мен мәдениеті, әдебиеті мен руханиятына қатысты өзекті мәселелер қозғалды. Ғалымдар Абайдың 180 жылдығы ел көлемінде мазмұнды шаралармен жоғары деңгейде аталып өткенін айтып, Абай облысынан шыққан тұлғалардың есімін ұлықтау, мәдени мұралар мен тарихи жәдігерлерді жаңғырту бағытында бірқатар ұсыныс-пікірлерін жеткізді.
Аймақ басшысы өз кезегінде мәдениет саласында атқарылған жұмыстарға тоқталып, Мемлекет басшысы Қасым-Жомарт Тоқаевтың тапсырмасына сәйкес Абайдың 180 жылдығы аясында өңірде 10 күндік форматта мәдени-рухани, танымдық әрі интеллектуалдық іс-шаралар ұйымдастырылғанын атап өтті. Сонымен қатар облыс әкімдігінің қолдауымен «Абай жолы» кітапханасы жобасы арқылы Семей өңірінен шыққан ақын-жазушылар мен өнер адамдарының 19 авторға тиесілі 25 кітабы жарық көріп, жалпы саны 12 500 дана болып басылып шыққан.
Сондай-ақ өңірдегі 8 мәдени нысанда ағымдағы және күрделі жөндеу жұмыстары жүргізіліп, 100 орындық екі ауылдық клуб пайдалануға берілгені айтылды. Биыл да бұл бағыттағы жұмыстардың жалғасатыны жеткізілді.
Кездесу соңында облыс әкімі айтылған ұсыныстар назарға алынып, тиісті жұмыс жоспарына енгізілетінін мәлімдеді.
